Նորվեգացի ահաբեկիչ Անդերս Բրեյվիկի գործով ամռանը շարունակվող դատավարությանը կհնչի հոգեբանների ևս մեկ՝ երրորդ փորձաքննության տարբերակը: Այս մասին հաղորդում է ITAR-TASS-ը՝ վկայակոչելով Նորվեգական հեռագրային բյուրոյին:
Նախաձեռնությունը պատկանում է տուժած կողմի պաշտպանությանը. նրանք դիմել են հոգեբան Ուլրիկ Մալթին, որը ավելի քան 20 տարի զբաղվում է նյարդահոգեբանությամբ և պսիխոսոմատիկ բժշկությամբ: Փաստաբան Կատրինե Գրենդալը մեկնաբանել է, որ «ևս մեկ մասնագետի կարիք կար՝ հասկանալու համար՝ ինչու են նախորդները (մինչ այդ փորձաքննություն անցկացրած հոգեբանները) հակասական եզարակացությունների հանգել»:
Ենթադրվում է, որ Մալթը դատարանում հանդես կգա այս տարվա հունիսին:
Մյուս կողմից, մի շարք փորձագետներ հավաստիացնում են, որ յուրովի ճիշտ են եղել և՛ այն հոգեբանները, որոնք Բրեյվիկին անմեղսունակ են ճանաչել, և՛ նրան մեղսունակ ճանաչածները:
Բրեյվիկի գործով դատավարությունը սկսվել է 2012 թ. ապրիլի 16-ին: Նա մեղադրվում է 2011 թ. հուլիսի 22-ին Օսլոյի կառավարության շենքի մոտ և Ուտոյա կղզում ահաբեկչության և 77 մարդու կանխամտածված սպանության մեջ:
