Ճապոնիայի խորհրդարանի Վերին պալատը այսօր երկրի պաշտպանության նախարար Նաոկի Թանաքիին քննադատող բանաձև է ընդունել, որում մեղադրում է նրան ռազմական գործի հմտություններին չտիրապետելու, թույլ իմացության և հյուսիսկորեական հրթիռի արձակման ժամանակ ձախողված վարքագիծ դրսևորելու մեջ: Այս մասին հաղորդում է ITAR-TASS գործակալությունը:
Փաստաթուղթն ընդունվել է ընդդիմության ներկայացուցիչների ձայներով: Բանաձևը չունի օրինական ուժ, սակայն ընդդիմությունը պահանջում է նրան անհապաղ տեղափոխել այլ աշխատանքի:
Թանաքեն ավելի վաղ խորհրդարանական բանավեճերի ժամանակ մեկ անգամ չէ, որ շփոթել է ռազմական տերմինաբանությունը, պատասխաններում թույլ է տվել սխալներ:
Ապրիլի 13-ին նրա գլխավորած պատվիրակությունը շատ ուշ արձագանքեց ԿԺԴՀ-ի կողմից արձակված հրթիռային արբանյակի արձակմանը: Հրթիռը պետք է անցներ ճապոնական կղզիների վրայով, և վթարի դեպքում նախատեսված էր ոչնչացնել այն: Հրթիռը արձակումից մեկ րոպե անց պայթել էր, սակայն Տոկիոն տվյալների խառնաշփոթի, դրա պակասի ու թյուրիմացության պատճառով չէր կարողացել ժամանակին տեղեկացնել բնակչությանը: Միայն հրթիռի արձակումից 40 րոպե անց էր հաղորդվել պաշտոնական տեղեկություն հրթիռի մասին, ինչը սուր քննադատության արժանացավ ընդդիմադիրների կողմից:
