Հասարակական կարծիքի ուսումնասիրության համառուսաստանյան կենտրոնը «Շանթ» հ/ը պատվերով ապրիլի 4-13-ը 1600 քաղաքացիների շրջանում հարցում է անցկացրել` Երևանում և ՀՀ մարզերում: Ինչպես այսօր ասուլիսի ժամանակ ներկայացրեց կենտրոնի տնօրեն Վալերի Ֆյոդորովը, ընտրություններին հաստատ մասնակցելու է 72%-ը, մասնավորապես` Երևանի բնակիչների 65%-ը, մարզերի` 75-76%-ը:
Առավել ակտիվ նախընտրական քարոզարշավ է իրականացնում ՀՀԿ-ն` 69%, ապա ԲՀԿ-ն` 65%, և ինչպես հավաստիացրեց Վ. Ֆյոդորովը` առաջատարների եռյակը եզրափակում է ՕԵԿ-ը` 27%: Նրանց հաջորդում են ՀՅԴ-ն` 11%, «Ժառանգություն» կուսակցությունը` 5%, ՀԱԿ-ը` 3%, կոմունիստական կուսակցությունը` 2%, «Միավորված հայերը»` 1%, և Հայաստանի դեմոկրատական կուսակցությունը` 1%:
Վ. Ֆյոդորովի տվյալներով` ՀՀԿ-ն կստանա կողմնորոշվածների 39% քվե, ԲՀԿ-ն` 36%: 5%-ի շեմը կհաղթահարեն նաև ՕԵԿ-ը` 7%, «Ժառանգությունը»` 6%, և ՀՅԴ-ն` 5%:
«Առաջին լրատվական»-ի հարցին` եթե մի կողմ թողնենք ՀՀԿ, ԲՀԿ և ՀԱԿ ցուցանիշները, ապա միայն ՕԵԿ-ի մասով դրանք շատ թերահավատություն են ներշնչում, ի՞նչն է ազդել նրանց վարկանիշի վրա` մուրաբանե՞րը, նվերնե՞րը, Վ. Ֆյոդորովը պատասխանեց` ՕԵԿ-ի վարկանիշը նախորդ ընտրություններից հետո խիստ ընկել է, սակայն շարունակում է գտնվել երրորդ դիրքում, իսկ մեր` հասարակ քաղաքացիներիս տպավորությունները դեռ չեն արտացոլում հասարակության տրամադրվածությունները:
Մեր դիտարկմանը` արդյոք բավարա՞ր է 1600 հոգու հարցումն այդ դեպքում, և ինչպե՞ս են ընտրվել հարցվողները, նա պատասխանեց. «Մենք գիտենք` ում հարցնենք, և 1600 հոգին քիչ չէ: Հարցումը ներկայանալի է և ցույց է տալիս միլիոնների տրամադրվածությունը»:
Ըստ կենտրոնի ղեկավարի` ԲՀԿ-ն և ՀԱԿ-ն այժմ աշխատում են դժգոհ ընտրազանգվածի վրա: Եվ եթե ՀԱԿ-ը չի քննադատում ԲՀԿ-ին և չի աշխատում դրա դեմ, ապա ավելի լավ ԲՀԿ-ի համար:
«Առաջին լրատվական»-ի հարցին` ինչպե՞ս է, որ ԲՀԿ-ն աշխատում է դժգոհ ընտրազանգվածի վրա, եթե նա իշխող կոալիցիայի մաս է կազմում, Վ. Ֆյոդորովը հայտարարեց` այնուամենայնիվ, ԲՀԿ-ն կոալիցիայի առաջատարը չէ, և բնորոշելով ԲՀԿ վարքը` նա մեջբերեց ռուսական հայտնի ասացվածքը` хочет и рыбу сьесть и не подавится:
