ՀԱԿ-ը պետք է իր մասին մտածի` որպես կույրաղիքի. այսօր լրագրողների հետ հանդիպման ժամանակ ասաց ՕԵԿ փոխնախագահ, թիվ 3 ընտրատարածքում առաջադրված պատգամավորության թեկնածու Մհեր Շահգելդյանը:
«Յուրաքանչյուր քաղաքական ուժ թող ներկայացնի իրեն: Խոսում են ուրիշի մասին, երբ ասելիք չունեն»,- նկատեց Մ. Շահգելդյանը:
Հարցին` ինչո՞ւ պետք է ընտրողը ընտրի կամ չընտրի ՕԵԿ-ին, Մ. Շահգելդյանը պատասխանեց` ընտրազանգված կա, որը կողմնորոշված է և ձայն է տալիս այն կուսակցությանը, որին հարում է:
«ՕԵԿ-ի կողմից իրականացված աշխատանքները կարելի է բաժանել երկու մասի. մի մասը իրականացված ծրագրերն են, մյուս մասը` իրականացման փուլում գտնվողները: Ավանդների վերադարձման հարցը, որի հիմնախնդրի լուծումը բավական երկար ժամանակ է պահանջում, ծնված երեխաների համար գումար փոխանցելու հարցը, երիտասարդական հիպոթեքային համակարգերի հարցը, որը բարելավման կարիք ունի և այլն. սրանք այն հարցերն են, որոնք ՕԵԿ-ի ուշադրության կենտրոնում են եղել և մնում»,- մեկնաբանեց Մ. Շահգելդյանը:
