«Ժառանգությունն» այն քաղաքական ուժն է, որը պատասխանատու չէ երկրի ավերածությունների համար: Այս մասին այսօր լրագրողների հետ հանդիպման ժամանակ հայտնեց ԱԺ «Ժառանգություն» խմբակցության պատգամավոր, թիվ 1 ընտրատարածքում առաջադրված պատգամավորության թեկնածու Ստեփան Սաֆարյանը` պատասխանելով հարցին, թե ինչու պետք է ընտրողն ընտրի «Ժառանգության»-ը:
Նա նշեց, որ ներկայացնում է քաղաքական ուժ, որը ոչ միայն պատասխանատու չէ այս երկրի ավերածությունների համար, այլև անցած տարիների ընթացքում ապացուցել է իր նվիրվածությունը այդ խնդիրների դեմ պայքարում: «Ժառանգությունն» այն քաղաքական ուժն է, որը ցանկացած պահի ուղղակիորեն ոչ միայն պաշտպանել է քաղաքացու շահը, այլև առաջարկել է այլընտրանքային լուծումներ` դա կլիներ փոքր բիզնես, կրպակների խնդիր, հանրային այգիների պաշտպանություն, թե քաղաքաշինական ծրագրեր:
«Մենք մշտապես առաջարկել ենք այլընտրանքային ծրագրեր: «Ժառանգություն»-ը այս իշխանությունների այլընտրանքն է»:
Նրա խոսքով` եթե շատ քաղաքական ուժերի դեպքում ընտրողն է կախված նրանցից, ապա «Ժառանգության» պարագայում հակառակն է` «Ժառանգությունն» է կախված ընտրողից, «Ժառանգություն»-ը ծառայել է ժողովրդին և ընտրողին:
«Մեր հայացքն ուղղված է ընտրողին և դեպի ժողովուրդը: Մենք ակնկալում ենք ժողովրդի քվեն` առանց նրան դրդելու գործարքների, եղել ենք շատ շիտակ: Կարծում եմ` մեր ժողովուրդը, լինելով շատ բան տեսած, կարող է տարբերակել` ով է «Ժառանգություն»-ը և ինչու պետք է նրան ընտրել»,- նշեց պատգամավորը:
Անդրադառնալով խախտումներին` Ս. Սաֆարյանն ասաց, որ իր շտաբի անդամները նաև պարզում են բնակիչների ցուցակները:
«Այս պահի դրությամբ ունենք շատ շենքերի տվյալներ, որտեղ առկա են երկրից բացակայողների անուններ: Օրինակ` շատ մարդիկ 15 տարի է` ՀՀ-ից բացակայում են, բայց ներառված են ցուցակում, մահացած անձինք ևս կան»,- նկատեց Ս. Սաֆարյանը:
Նա նշեց` վստահ է, որ բոլորն են ճանաչում նույն ընտրատարածքում առաջադրված Ռուբեն Հայրապետյանին, սակայն Գայանե Առուստամյանին չեն ճանաչում:
Ստեփան Սաֆարյանը նաև խոսեց խոչընդոտների մասին` ասելով, որ անկուսակցական թեկնածուի քարոզիչները մտել էին Նոր Նորքի 2-րդ զանգվածի մի բնակարան, և երբ պարզել էին, որ նրանք քվեարկելու էին իր օգտին, չափազանց տգեղ հակաքարոզչություն էին իրականացրել:
