ՀՀ Ոստիկանությունը ապրիլի 17-ին հաղորդագրություն էր տարածել, ըստ որի՝ Մաշտոցի պուրակի անօրինական կրպակներն ապամոնտաժող քաղաքացիների նկատմամբ իրականացվում է վարչական իրավախախտումների վերաբերյալ վարույթ: Ոստիկանները այսօր, ժամը 09:30-ին, այցելել են ՌԱՀՀԿ նախագահ, Մաշտոցի պուրակի ապամոնտաժող կրպակներից առաջին բրիգադի անդամ Մանվել Սարգսյանին՝ պատճառաբանությամբ, որ ապրիլի 15-ին պուրակում իրականացված գործողությունների ժամանակ Մանվել Սարգսյանը բազրիքն անցել է, որի համար ցանկացել են ակտավորել. «Ասացի՝ ինչո՞ւ չեք ակտավորել տեղում, պատասխանեցին, որ իրենք այսպես էլ իրավունքն ունեն ակտավորելու»,- պատմեց Մանվել Սարգսյանը:
Հարցին՝ոստիկանության այս քայլը արդյոք վախեցնելո՞ւ, ընկճելո՞ւ նպատակ ունի, Մանվել Սարգսյանը պատասխանեց, որ իրենք իրենց ոտքով-ձեռքով պուրակ են եկել և հայտարարել` եթե անօրինական են իրենց գործողությունները, ձերբակալեն և տանեն: Պարզապես, նրա խոսքերով, հիմա սկսել են քաղաքակիրթ եղանակով զբաղվել, մինչև հիմա ոտքով- ձեռքով էին զբաղվում:
«Նպատակը ո՞րն է. չես հասկանում, իրենք իրենց համար պրոբլմներ են ստեղծում, սակայն մենք մեր գործը անելու ենք»,- ասաց Մանվել Սարգսյանը:
Հիշեցնենք, որ ապրիլի 15-ին ապամոնտաժող վեց խմբերը Մաշտոցի պուրակում կարողացան հաջողություն գրանցել՝ մտնելով կրպակներ և այնտեղից հանելով երեք գամ:
