Հանգստյան օրերին կայացավ Իտալիայի առաջնության 21-րդ տուրը: Մրցաշարային աղյուսակի առաջին վեց հորիզոնականները զբաղեցնող թիմերից միայն երեքին հաջողվեց պարտության մատնել մրցակիցներին:
«Ռոմա»-ն Հռոմի «Օլիմպիական» մարզադաշտում երեք անպատասխան գնդակ ուղարկեց «Կալյարի»-ի դարպասը և 1 միավորով շրջանցեց «Լացիո»-ին, որը հյուրընկալվելիս 3:1 հաշվով զիջեց «Բոլոնիա»-ին: Տանտերերի կազմում դուբլի հեղինակ դարձավ այս խաղաշրջանում հրաշալի մարզավիճակ ձեռք բերած Մարկո Դի Վայոն:
«Ինտեր»-ը Լեոնարդոյի գլխավորությամբ իր առաջին պարտությունը կրեց: 16-րդ րոպեին հանդիպման հաշիվը բացեց Ստանկովիչը, բայց այնուհետև Լեոնարդոյի սաները երեք անպատասխան գնդակ ընդունեցին իրենց դարպասը: «Ուդինեզե»-«Ինտեր»` 3:1:
«Յուվենտուս»-ը չկարողացավ կոտրել «Սամպդորիա»-ի դիմադրությունը. գրանցվեց գոլազուրկ ոչ-ոքի:
Մրցաշարային աղյուսակի երկրորդ հորիզոնականը զբաղեցնող «Նապոլի»-ն Լավեցցիի ու Կավանիի գոլերի շնորհիվ մրցակցի հարկի տակ առավելության հասավ «Բարի»-ի նկատմամբ:
Առաջատար «Միլան»-ը երկու անպատասխան գնդակ ուղարկեց «Չեզենա»-ի դարպասը և շարունակում է 4 միավորով գերազանցել «Նապոլի»-ին:
Մյուս հանդիպումներում գրանցվեցին հետևյալ արդյունքները. «Պալերմո»-«Բրեշիա»` 1:0, «Պարմա»-«Կատանիա»` 2:0, «Կևո»-«Ջենոա»` 0:0, «Ֆիորենտինա»-«Լեչե»` 1:1: