ՌԴ ԱԳ նախարար Սերգեյ Լավրովն ընդունել է, որ Քոֆի Անանի ծրագրի համաձայն՝ Սիրիայում ապրիլի 12-ից հաստատված հաշտությունը «բավականին փխրուն է»:
Դրա հետ մեկտեղ Լավրովն ընդգծել է, որ Քոֆի Անանի ծրագրի տապալմամբ շահագրգռված մարդիկ կան, որոնք մինչ ծրագրի հրապարակումն ասում էին, որ այն ձախողման է դատապարտված: Ըստ նախարարի՝ այդ ուժերը խոչընդոտել են Սիրիայում քաղաքական փոխհամաձայնության հաստատմանը` պահանջելով միայն վարչակարգի փոփոխություն:
«Մենք այսօր ևս տեղեկատվություն ունենք այն մասին, որ նրանք, ովքեր ի սկզբանե ձգտել են տապալել Անանի ծրագիրը, մեծ ջանքեր են գործադրում, որպեսզի այդ մարգարեությունն իրականանա: Դա արվում է ընդդիմադիրներին զենք տրամադրելու, գրոհայիններին քաջալերելու միջոցով»,- ասել է Լավրովը:
Նախարարի խոսքերով` ՄԱԿ ԱԽ-ի որոշումը կատարելու համար պետք է ճնշում գործադրել Սիրիայում հակամարտող կողմերի վրա։
