News Georgia-ի փոխանցմամբ՝ Ռուսաստանի իշխանությունները չեն ցանկանում, որ ռուս զբոսաշրջիկները տեսնեն, թե ինչպես է զարգանում Վրաստանը, ինչի համար էլ նրանց խորհուրդ են տալիս չայցելել Վրաստան: Այս մասին այսօր տեղի ունեցած ճեպազրույցի ժամանակ հայտարարել է Վրաստանի փոխարտգործնախարար Նինո Կալանդաձեն.
«Ռուսաստանի քաղաքացիների համար Վրաստանում վտանգ է ներկայացնում ոչ թե օկուպացիայի մասին օրենքը, այլ՝ Վրաստանում տիրող իրավիճակը: Նրանք վախենում են, որ ռուս զբոսաշրջիկները իսկապես կտեսնեն, թե իրականում ինչպիսին է իրավիճակը Վրաստանում և կհամոզվեն, թե որքանով դա չի համապատասխանում ռուսական ապատեղեկատվությանն ու Վրաստանի նկատմամբ քարոզչությանը:
Ռուսաստանի իշխանություններն իրենց քաղաքացիներին կոչ են անում չայցելել Վրաստան, որպեսզի հետագայում հարցեր չհնչեն, թե ինչպես է Վրաստանին հաջողվել թոթափել խորհրդային ժառանգությունը և հաղթել կոռուպցիային, ինչն անել չի հաջողվել Ռուսաստանում: Նրանք կտեսնեն, որ Վրաստանում պաշտպանված են մարդու իրավունքները, մինչդեռ Ռուսաստանում դրանք խախտվում են ամեն օր: Ռուսաստանի իշխանությունները վախենում են այդպիսի հարցերից»:
Հիշեցնենք, որ Ռուսաստանի արտգործնախարար Սերգեյ Լավրովը հայտարարել է, որ նախկինում Աբխազիա կամ Հարավային Օսիա այցելած Ռուսաստանի քաղաքացիները Վրաստան այցելելու դեպքում օկուպացիայի մասին օրենքով ենթարկվում են քրեական պատասխանատվության և խոշոր տուգանքների:
