ԿԺԴՀ-ն հրաժարվել է Ատոմային էներգիայի գործակալության (ԱԷՄԳ) փորձագետներին թույլ տալ այցելել միջուկային օբյեկտներ: Այս մասին տեղեկացրել է Interfax գործակալությունը` մեջբերելով ճապոնական ԶԼՄ–ներին:
NHK ճապոնական գործակալության տեղեկատվության համաձայն` Փխենյանն ապրիլի 16-ին իր որոշման մասին պաշտոնապես տեղյակ է պահել ԱԷՄԳ-ին:
ԿԺԴՀ-ն խոստացել էր ԱԷՄԳ-ի փորձագետներին հրավիրել այցելելու իր միջուկային օբյեկտները 2012 թ. մարտին: Դրա փոխարեն ԱՄՆ–ը համաձայնել էր Փխենյանին տրամադրել մթերային օգնություն: Հաղորդվել է, որ Փխենյանը հրաժարվել է թույլ տալ միջազգային փորձագետներին այցելել միջուկային օբյեկտներ, քանի որ ԱՄՆ-ը հրաժարվել էր մթերային օգնություն տրամադրել հրթիռի արձակումից հետո:
Հիշեցնենք, որ «Կվանմենսոն-3» արբանյակային հրթիռն արձակվել էր Չխոլսանի հրթիռային փորձակայանից: ԿԺԴՀ-ն պաշտոնապես հրթիռի փորձարկումը ճանաչել էր անհաջող:
Reuters գործակալության փոխանցմամբ` ՄԱԿ-ի Անվտանգության խորհուրդը մտադիր է մոտ ժամանակներս բանաձև ընդունել, որը կդատապարտի հյուսիսկորեական հրթիռի արձակումը։
