Ռուսական ВЗГЛЯД թերթի փոխանցմամբ՝ Վրաց պատրիարք Իլյա 2-րդը Սուրբ Զատիկի կապակցությամբ հղած իր ուղերձում հանդես է եկել բարձր հարկերի ու խաղատների դեմ.
«Չնայած նրան, որ երկիրը որոշակի զարգացում է ապրել, բնակչության մեծ մասը սոցիալապես պաշտպանված չէ: Ցածր են ազգային արտադրության, միջին և փոքր բիզնեսի ցուցանիշները, շուկայում գերիշխում է ներկրված արտադրանքը, վճարումները, այդ թվում նաև կոմունալ վճարները շատ բարձր են:
Պետք է ընդունել այնպիսի օրենքներ, որոնք կթեթևացնեն հարկային բեռը: Դա մասնավորապես վերաբերում է գյուղատնտեսական ոլորտին: Պետք է օգնել գյուղացիներին, որպեսզի նրանք կարողանան արտադրել էկոլոգիապես մաքուր արտադրանք:
Վերջինիս պահանջարկը շատ մեծ է համայն աշխարհում: Կարծում եմ, որ մեր պետությունը կգտնի վաճառքի շուկաներ: Եթե դա տեղի ունենա, ապա շուտով կգրանցվի զգալի առաջընթացը: Մարդկանց մոտ կվերադառնա աշխատելու ցանկությունը:
Վրաստանը ոչ միայն ուժ է հավաքում, այլև քարոզում է գռեհիկ մտածելակերպ, որը խաղում է մարդու կենդանական բնազդների վրա: Դա լիովին հակասում է իրական ազատությանը: Օրինակ՝ Թբիլիսիի կենտրոնում՝ Պատրիարքարանի մերձակայքում, սուրբ վայրում կառուցված է «Բուդդա-բար»՝ խաղատուն և բուքմեյքերական կենտրոն:
Քաղաքակիրթ ու ժողովրդավարական երկրներում այդպիսի հաստատությունները կամ արգելված են, կամ էլ գտնվում են քաղաքի հասարակական վայրերից, ուսումնական կամ կրոնական հաստատություններից, քաղաքային կենտրոններից մեծ հեռավորության վրա ընկած վայրերում»:
Վրացական լրատվամիջոցներն ընդգծում են, որ Վրաստանի նախագահ Միխեիլ Սաակաշվիլին ապրիլի 9-ին այցելել է «Բուդդա-բար»:
