«Ժառանգության» և Ազատ դեմոկրատների արագածոտնյան քարոզարշավի ընթացքում այցելություն եղավ Քուչակ գյուղ, որտեղ ընտրողներին ողջունեց Ազատ դեմոկրատներ կուսակցության նախագահ, «Ժառանգության» հետ միասնական շտաբի ղեկավար Խաչատուր Քոքոբելյանը: Նա նշեց, որ այս տարիների ընթացքում իրենք բոլորն ապրել են մարդու իրավունքների և արժանապատվության համար ու շարունակելու են այդ ուղղությամբ: Քոքոբելյանը նշեց, որ ցանկացած շրջան այցելելով, ժողովրդի աչքերին նայելով՝ տեսնում են, որ նրանց բոլորի մեջ կա կամք մնալու հայրենիքում, չլքելու երկիրը և արժանապատիվ ապրելու սեփական երկրում. «Մենք կոչ ենք անում փոխել ոչ թե երկիրը, այլ իշխանություններին»:
Քոքոբելյանի գնահատմամբ՝ եթե ներմուծվող ապրանքատեսակներից որոշ հարկատեսակներ հանվեն, ապա դրանցով հնարավոր կլինի հենց Քոչարում և նմանատիպ բնակավայրերում գործարան հիմնել ու ստեղծել աշխատատեղեր: Նրա խոսքերով՝ եթե գործարանը փակ է, նա առանց այդ էլ հարկ չի վճարում, ու ավելի նախընտրելի կլիներ, որ փոքր գործարաններն ազատվեին հարկերից ու կարողանային աշխատել, քանզի դրանով գոնե աշխատատեղեր կստեղծվեին: Ազատ դեոկրատների նախագահի խոսքերով՝ գործարանները չեն աշխատում, որովհետև մրցակցություն չկա, որովհետև ներմուծմամբ են զբաղվում սահմանափակ թվով մարդիկ:
Խաչատուր Քոքոբելյանը վստահեցրեց, որ իրենք տեր են կանգնելու իրենց ընտրողների ձայներին: Նա նաև, ի տարբերություն մյուսների, ընտրողներին ուղղակիորեն կոչ արեց ընտրել հենց «Ժառանգությանը»՝ Րաֆֆի Հովհաննիսյանի գլխավորությամբ. «Որովհետև ես համոզված եմ, որ հենց այդ ճանապարհով կհասնենք մեր բոլոր նպատակներին»:
