Սոցիոլոգ Ահարոն Ադիբեկյանը դժվարանում է կանխատեսել՝ որքա՞ն արժանահավատ կլինեն Gallup International Association-ի՝ մայիսի 6-ին Հայաստանում անցկացնելիք «էքզիտ-փոլի» արդյունքները, քանի որ իր գործունեության ողջ ընթացքում այդ կազմակերպությունը ընդամենը 5-6 անգամ է ճիշտ կռահել ընտրությունների արդյունքները: Նման տեսակետ Ադիբեկյանը հայտնեց «Առաջին լրատվական»-ի հետ զրույցում:
«Նախ, կարևոր են Gallup-ի «էքզիտ-փոլին» նախորդող սոցհարցումների արդյունքերը: Եթե նա չպատասխանի այն հարցերին, թե քանի՞ հոգի և ինչո՞վ են գալու ընտրության, կնշանակի՝ իր կատարած աշխատանքները անտեղի էին: Միաժամանակ, եթե կազմակերպությունը չի կարողանում կանխատեսել իր երկրում ընտրությունների արդյունքները, որքան էլ պրոֆեսիոնալ լինի, ինչպե՞ս կարող է կանխատեսել անծանոթ երկրում կայանալիք ընտրությունների արդյունքները»,- ասաց սոցիոլոգը:
Հարցին՝ հաշվի առնելով, որ Gallup International Association-ի կողմից անցկացվելիք սոցհարցման և «էքզիտ-փոլի» պատվիրատուն «Արմենիա» հեռուստաընկերությունն է, կարո՞ղ են հարցումների արդյունքները կանխակալության տարրեր պարունակել, Ահարոն Ադիբեկյանը նկատեց. «Կարծում եմ՝ նման կազմակերպությանը դժվար կլինի կաշառել, ուղղակի Gallup-ը կստանա այն թվերը, ինչ իրեն են հարկավոր»:
Հիշեցնենք, որ «Արմենիա» հեռուստաընկերությունը և Gallup International Association-նն օրերս պայմանագիր են ստորագրել ըստ որի` Gallup սոցիոլոգիական հետազոտությունների կենտրոնը մայիսի 6-ին կայանալիք ԱԺ ընտրությունների առիթով կիրականացնի սոցիոլոգիական հարցում և ««էքզիտ-փոլ»: Խորհրդարանական ընտրությունների քարոզարշավի ընթացքում անցկացված հարցման արդյունքները կհրապարակվեն ոչ ուշ, քան մինչև ապրիլի 27-ը: Սոցիոլոգիական հարցումը կիրականացվի Երևանում և Հայաստանի մարզերում, «էքզիտ-փոլը» կիրականացվի մայիսի 6-ին՝ ընտրությունների օրը, պարզելու ընտրական իրավունք ունեցող և ընտրությանը մասնակցած ՀՀ քաղաքացիների քաղաքական նախասիրությունները: