ՀՅԴ-ն այսօր Կապանից սկսեց նախընտրական իր հանրահավաքները դեպի հանրապետության մարզեր: Սյունիքի մարզկենտրոնում անցկացված հանրահավաքին մեծ թիվ էին կազմում դպրոցահասակ երեխաներն ու երիտասարդները, ովքեր հիմնականում հանդիպման վայր էին եկել Դաշնակցությանն ուղեկցող երգիչների համերգային ծրագրին մասնակցելու, որի բացումն արեց երգիչ Ներսիկ Իսպիրյանը:
Հանրահավաքի բովանդակությունից գաղափար չունեցող դպրոցահասակները ցուցանակներ եւ դրոշներ պարզած կանգնել էին առաջին շարքերում, իսկ ետին շարքերում կանգնած աշակերտները սպասում էին հանրահավաքի ավարտին ու համերգային ծրագրի մեկնարկելուն: Հանրահավաքին ներկա էին նաեւ միջին տարիքի ու մեծահասակ քաղաքացիներ, որոնք եկել էին հենց հանրահավաքին մասնակցելու եւ կուսակցության ծրագրերին ծանոթանալու համար:
ՀՅԴ բյուրոյի անդամները, պատգամավոր ներկայացուցիչները կապանցիներին ներկայացրեցին իրենց նախընտրական ծրագրերը եւ այն առաջարկներն ու անելիքները, որոնք նրանք մտադիր են իրականացնել առաջիկա տարիներին:
«Կապանցիները ՀՀ ազատ քաղաքացիներ են եւ իրենք կարող են ու պարտավոր են այս երկրում իրավիճակ փոխել: Չի կարող երկրում առաջընթաց լինել, եթե ամբողջ իշխանությունը, մեծամասնությունը մի կուսակցության ձեռքին է: Ուզեն, թե չուզեն, ցանկանան, թե` չէ, այլասերվում են, կարծում են իրենց ամեն ինչ թույլատրելի է, սկսում են սպառնալ, վախեցնել, հրամայել: Այս Ազգային ժողովը պետք է այլ պատկեր ունենա եւ Դաշնակցությունը պիտի շատ ավելի ծանրակշիռ ներկայություն ունենա»,- իր ելույթում նշեց Աղվան Վարդանյանը:
Իսկ Կապանից մեծամասնական ընտրակարգով թիվ 38 ընտրատարածքում առաջադրված, ՀՅԴ ներկայացուցիչ, պատգամավոր Գագիկ Գեւորգյանը կոչ արեց իր մրցակիցներին առանց փոխադարձ վիրավորանքների ու միայն քաղաքակիրթ պայքարի շրջանակներում տանել նախընտրական քարոզչությունը` խոստանալով լինել դրա վառ օրինակը: