Грузия Online-ի փոխանցմամբ՝ վերջին երեք տարիներին Վրաստանում 28 տոկոսով ավելացել է վարորդական իրավունք ստանալ ցանկացող կանանց ու աղջիկների քանակը: Այս մասին հայտարարել է Վրաստանի ՆԳՆ-ի տեղեկատվա-վերլուծական դեպարտամենտը:
Վերջինիս կատարած հետազոտությունը վկայել է, որ վրացուհիները վարորդ են դառնում հիմնականում 21-30 տարեկան հասակում, մինչդեռ տղամարդիկ հիմնականում վարորդական վկայական են ստանում մինչև 26 տարեկան հասակում:
Նշվում է, որ սովորաբար վրացի տղամարդիկ վարորդական իրավունքի ստացման համար նախատեսված քննության գործնական մասը հանձնում են առաջին կամ երկրորդ փորձից: Մինչդեռ վրացուհիների 45 տոկոսը դա անում է չորրորդ կամ ավելի փորձից, և միայն նրանց 18 տոկոսին է հաջողվում դա անել առաջին փորձից:
Վրաստանի ՆԳՆ-ն ընդգծում է, որ եղել է դեպք, երբ վարորդական վկայական ստանալ փորձող անձը (չի նշվում նրա սեռական պատկանելությունը) քննության գործնական մասը կարողացել է հանձնել միայն 31-րդ փորձից:
Մինչդեռ քննության տեսական բաժնում կանանց գործերն ավելի լավ են ընթանում: Առաջին փորձից տեսական քննությունը հաղթահարել է կանանց 67 և տղամարդկանց 60 տոկոսը: Վրաստանում արական սեռի ներկայացուցիչ վարորդների 70 տոկոսն ունի ավտոմեքենա վարելու 10-ամյա փորձ, մինչդեռ կին վարորդների 1/3-ի մոտ այն կազմում է մոտ 5 տարի:
