ՀՖՖ նախագահ Ռուբեն Հայրապետյանը վերջնականապես որոշել է առաջադրվել Ավանի թիվ 1 ընտրատարածքում, քանի որ վերջերս նրան տեղեկություններ են հասել, որ ՀԱԿ առաջնորդ Լևոն Տեր-Պետրոսյանն ուզում է առաջադրվել նույն ընտրատարածքում:
«Ես էլ ուզեցի օգտվել հաճույքից և անպայման առաջադրվել՝ քաղաքական բանավեճերի միջոցով ցույց տալու, թե ով է նա իրականում: Այն էլ մարդը վախեցավ ու իր թեկնածությունը չդրեց: Այս վերջերս էլ մի հայտարարություն է արել, թե ինքը «ռազբորկի» չի գնում;
Տարիներ շարունակ ինքը ձգտել է ինձ հետ շփվել: Եկել, շփվել է: Էդ շփումները եթե ռազբորկա են եղել, ուրեմն այս մի «ռազբորկային» էլ կարող է գալ: Բազմաթիվ անգամ տարբեր տրամաչափի բանագնացներ է ուղարկել, որ աջակցեմ իրեն: Տարիներ շարունակ իր տղային ուղարկել է ինձ մոտ: Եթե ուղարկել է, ուրեմն իմ հիմիկվա հրավերն էլ է ռազբորկա:
Ուղղակի այդ մարդն այդքան ազնվություն չունի, որ ասի՝ տարիներ շարունակ ինձ հետ ինչ ռազբորկաներ է արել: Իսկ հիմա ինձ հետ բանավեճի ՀԱԿ-ից չեն գալիս՝ իմանալով, որ քաղաքական բանավեճ ինձ հետ չեն կարող վարել»,- ասաց նա:
Հարցին՝ իր առաջադրման հարցում իրո՞ք դեր է ունեցել Սամվել Ալեքսանյանը, արդյոք վերջինս համոզե՞լ է իրեն, Հայրապետյանն ասաց. «Իհարկե, պրն Ալեքսանյանը կատակ է արել: Նա իմ ընկերն է և նման կատակ անելու իրավունք ունի: Արդեն ասացի, որ առաջադրվելուս իրական պատճառն ինձ հասած ինֆորմացիան էր»:
Հարցին՝ ինչպե՞ս կվերաբերվի այն փաստին, որ ԱԺ պատգամավոր Սամվել Ալեքսանյանը ընդունի Նիկոլ Փաշինյանի հեռուստաբանավեճի հրավերը՝ ՀՖՖ նախագահը պատասխանեց. «Ես կդադարեմ հարգել Սամվել Ալեքսանյանին, եթե նա գնա ու բանավիճի ղժղժացող Նիկոլ Փաշինյանի հետ: Սամվել Ալեքսանյանի հետ բանավեճի թող գնա Նիկոլի առաջնորդը, և Ալեքսանյանը կապացուցի՝ ի՞նքն է այս երկրի համար օգտակար, թե՞ նույն Լևոն Տեր-Պետրոսյանը:
Կարող ա՞ Ալեքսանյանը Նիկոլից վախենում է, թե՞ խելքն է նրանից պակաս: Ափսոս այստեղ շատ աղջիկներ կան, ես էլ դաստիարակված մարդ եմ, չեմ ուզում տեսախցիկների առաջ ասել՝ իրականում ինչ է Նիկոլի անունը»:
ՀՖՖ նախագահը նաև հիշեցրեց, որ տարիներ առաջ շտաբների հարցով օգնել է Լ. Տեր-Պետրոսյանին: «Այն ժամանակ էլ, երբ շտաբի հարց ուներ, ես իրեն օգնել եմ, ինչպես պատրաստ եմ օգնել ՀՀ ցանկացած խեղճ քաղաքացու: Խեղճ ասելով՝ միայն ողորմություն խնդրողին մի հասկացեք; Դա կարող է նշանակել նաև քաղաքականապես տհաս, որին պետք է օգնել»,- բացատրեց Ռուբեն Հայրապետյանը:
«ՀԱԿ-ը ծայրից ծայր պիտի ամաչի իմ ներկայությամբ, բայց ոչինչ, թող ամոթխած՝ գան, նստեն ԱԺ-ում, այդպես էլ միասին կաշխատենք»,- կեսկատակ-կեսլուրջ ասաց Հայրապետյանը:
Հարցին՝ ԱԺ-ում առաջինը ո՞ր օրենքի վրա է աշխատելու, պատասխանեց՝ «Սպորտի մասին»:
Ամփոփելով՝ ԱԺ պատգամավորը հերքեց լուրերը, որ ինքը Նոր Նորքի 4-րդ զանգվածի դպրոցների ու մանկապարտեզների տնօրեններին հավաքել է քաղաքի ռեստորաններից մեկում և խնջույքի ժամանակ հորդորել ընտրություններին քվեարկել ՀՀԿ պատգամավորության թեկնածու Սամվել Ֆարմանյանի օգտին:
«Նման բան ասողները ստախոս են: Ես նման բան ոչ ոքի չեմ հորդորել»,- ասաց Հայրապետյանը:
Հարցին՝ ինչպե՞ս է վերաբերվում ՀՀԿ-ական Տիգրան Արզաքանցյանի այն հայտարարությանը, որ իրեն հանձնարարական չի եղել, և ինքն ընտրությունների ընթացքում չի աշխատելու ՀՀԿ մեկ այլ թեկնածուի՝ Մանվել Բադեյանի օգտին, ՀՖՖ նախագահը պատասխանեց. «Իսկ կարելի՞ է իմանալ՝ ո՞վ է Տիգրան Արզաքանցյանը: Կներեք, տեղը չեմ բերում, չեմ ճանաչում»:
