ՆԱՏՕ-ի երկրները զարմացած են, թե ինչու են Ռուսաստանում խոսակցություններ պտտվում Ուլյանովսկում ռազմական բազայի ստեղծման մասին, դա թյուր կարծիք է: Այս մասին այսօր Эхо Москвы ռադիոկայանին տված հարցազրույցում հայտարարել է Դաշինքի տեղեկատվական բյուրոյի տնօրեն Ռոբերտ Պշելը:
«Խոսքը վերաբերում է միայն տրանզիտին»,- ասել է նա՝ ավելացնելով. «Դա բազա չէ: Ռուսաստանի տարածքում զինվորականներ և զենք չի հայտնվի: Տարօրինակ է, որ նման խոսակցություններ են շրջանառվում»: Պշելը հիշեցրել է, որ Ուլյանովսկի տրանզիտային հանգույցի դերն առաջարկել է ռուսական կողմը` կապված լոգիստիկայի խնդիրների հետ: «Տրանզիտը կարող էր կազմակերպվել նաև այլ տեղում, սակայն ընտրվել է Ուլյանովսկը»,- հավելել է տեղեկատվական բյուրոյի տնօրենը: Նա նաև նշել է, որ ՆԱՏՕ-ն պատրաստ է համագործակցել Ռուսաստանի հետ հակահրթիռային պաշտպանության հարցում:
«Եվրահակահրթիռային պաշտպանություն ստեղծելու որոշումն ընդունվել է երկարատև քննարկումներից հետո, և ՆԱՏՕ-ն որոշել է, որ նման համակարգ կառուցելն անհրաժեշտ է»,- նշել է Պշելը: «Մենք զբաղվում ենք դրանով և կուզեինք զբաղվել Ռուսաստանի հետ համագործակցելով, քանի որ կարծում ենք, որ մեր հանդեպ սպառնալիքները շատ նման են, անգամ՝ նույնն են»:
