Այսօր BBC-ն նոր փաստաղթեր է հրապարակել, որոնք վկայում են 2003-2004 թթ. Մեծ Բրիտանիայի և Լիբիայի հատուկ ծառայությունների միջև եղած կապի մասին: Հաղորդագրության մեջ մասնավորապես մեջբերումներ են կատարվում MI-6-ի բարձրաստիճան պաշտոնյայի կողմից Լիբիայի հետախուզության նախկին ղեկավար Մուսա Քուսային ուղղված նամակից, որում նա Լիբիայի իշխանություններին շնորհավորում է «բեռը բարեհաջող ստանալու կապակցությամբ»:
Հոդվածի հեղինակ Փիթեր Թեյլորը գրում է, որ տվյալ դեպքում «բեռ» անվանվում է Բանգկոկում MI-6-ի և ԿՀՎ-ի հատուկ գործողությունների արդյունքում ձերբակալված Աբդել Հաքիմ Բելհաջը: Վերջինս եղել է հակակառավարական Լիբիական ռազմական իսլամական խմբի (ԼՌԻԽ) ղեկավարը, իսկ երկրում 2011 թ. քաղաքացիական պատերազմի ժամանակ հանդես է եկել ընդդիմադիր Լիբիայի Ազգային անցումային խորհրդի կողմից և եղել է Տրիպոլիում ապստամբների ուժերի հրամանտարը: ԼՌԻԽ-ը ՄԱԿ-ի կողմից ներառված է «Ալ-Քաիդա»-ի հետ կապված ահաբեկչական խմբավորումների ցուցակում, իսկ ինքը՝ Բելհաջը, համաձայն MI-6-ի՝ աֆղանա-խորրդային հակամարտության տարիներին անձամբ հանդիպումներ էր ունենում Ուսամա բեն Լադենի հետ:
Լիբիայի անվտանգության ուժերի հետ բրիտանական և ամերիկյան հետախուզության համագործակցության վերաբերյալ փաստաթղթերի արխիվը հայտնաբերվել է Լիբիայում՝ Մուսա Քուսայի լքված առանձնատանը: Հենց այդ նյութերից էլ վերցրել են Բելհաջին վերաբերող տեղեկությունը: Ինքը՝ դաշտային հրամանատարը, Բրիտանիայի իշխանություներին մեղադրում է այն բանում, որ ինքը 4 տարի անցկացրել է Լիբիայի բանտում, որտեղ իրեն խոշտանգումների են ենթարկել: Նրա խոսքերով՝ հարցաքննությունների ժամանակ հաճախ ներկա են եղել արևմտյան հետախուզության ներկայացուցիչներ:
Հունվարին Բելհաջը դատական հայց էր ներկայացրել MI-6-ի նախկին հակաահաբեկչական վարչության ղեկավար Մարկ Ալենի դեմ (հենց Ալենն էլ նամակ էր հղել Քուսային): Լոնդոնի ոստիկանությունն այս պահին ուսումնասիրում է լիբիացու ձերբակալման հետ կապված հանգամանքները: Ընդ որում, ժամանակավորապես դադարեցվել են ավելի վաղ երկրի վարչապետ Դևիդ Քեմերոնի նախաձեռնությամբ կազմված հանձնաժողովի աշխատանքները, որը նպատակ ուներ պարզել՝ արդյոք բրիտանական հատուկ ծառայությունները ներգրավվա՞ծ են եղել լիբիացու խոշտանգումների մեջ:
