Ամերիկյան ծովային հետևակ Գարի Սթայնին առաջարկում են բանակից ազատել՝ համացանցում ԱՄՆ նախագահ Բարաք Օբամայի հասցեին քննադատական արտահայտություններ անելու համար: Այս մասին հայտնում է Agence France-Presse-ը:
Ծովային հետևակի կորպուսի ռազմական կոլեգիան ապրիլի 5-ին առաջարկել է հեռացնել 26-ամյա սերժանտ Սթայնին: Վերջնական որոշումը կընդունի գեներալը: Ինչպես նշվում է Associated Press-ի հրապարակման մեջ, գեներալը համաձայն չէ կոլեգիայի որոշման հետ, հարցը կարող է վերանայման համար փոխանցվել ԱՄՆ ռազմածովային ուժերի նախարարին:
Հրամանատարության ներկայացուցիչը լսումների ժամանակ ընդգծել է, որ նախագահի, ով գերագույն հրամանատարն է, քննադատությունը չի կարող վնաս չհասցնել կարգուկանոնին: Սթայնի փաստաբաններն իրենց հերթին ընդգծել են, որ քննադատական արտահայտությունները Սթայնը հրապարակել է այն ժամանկ, երբ ծառայության մեջ չի եղել: Փաստաբանների կարծիքով՝ այդ մեկնաբանությունները խոսքի ազատության սահմանադրական երաշխիքների պաշտպանության տակ են գտնվում:
Սերժանտ Սթայնը Օբամային քննադատել է Facebook-ում և այլ կայքերում: Նա նախագահին «վախկոտ» է անվանել և «տնտեսական ու կրոնական թշնամի»: Սերժանտը հույս է հայտնել, որ Օբաման կպարտվի 2012 թվականի նոյեմբերի վեցին կայանալիք նախագահական ընտրություններում:
Սթայնը բանակում ծառայել է 9 տարի, այդ թվում՝ նաև Իրաքում:
Սթայնի ծառայության ժամկետը լրանում է հունիսին:
