Ամերիկյան իշխանությունները մեղադրանք են ներկայացրել Կենտրոնական հետախուզական վարչության նախկին գործակալ Ջոն Քիրաքուին՝ պետական գաղտնիքը հրապարակելու համար։ Այս մասին հաղորդում է Associated Press-ը:
Հետաքննողները կասկածում են, որ Քիրաքուն մի շարք լրագրողների պատմել է հետախուզական գերատեսչության աշխատանքի մեթոդների մասին, ինչպես նաև հրապարակել է գաղտնի գործակալի անունը, ով մասնակցել է «Ալ-Կաիդա»–ի առաջնորդների ձերբակալման գործընթացին։
Բացի այդ, ԿՀՎ–ի նախկին գործակալին մեղադրում են այն բանում, որ նա գիտակցաբար ստել է իր ղեկավարությանը` փորձելով ստանալ իր գրքի հրապարակման թույլտվությունը։ Նրա հանդեպ առաջ քաշված մեղադրանքների հաստատվելու դեպքում Քիրաքուին սպառնում է 45 տարվա ազատազրկում:
Քիրիաքուն ԱՄՆ-ում լայն ճանաչում է ստացել 2007 թվականին, երբ հեռուստահարցազրույցի ժամանակ մանրամասն պատմել է ահաբեկչության մեջ կասկածվողներից տեղեկություն ստանալու համար ԿՀՎ–ի կողմից իրականացվող խոշտանգումների մասին: Նրա կարծիքով՝ նման մեթոդների կիրառումն արդյունավետ էր և արդարացված միայն 2001 թվականի սեպտեմբերի 11-ի ահաբեկչությունից հետո, սակայն ավելի ուշ դրանք դարձան անիմաստ:
Նախկին գործակալի դատավարությունը պետք է սկսվի ապրիլի 13-ին: Տվյալ պահին նա գրավի դիմաց ազատության մեջ է:
Ո՛չ Քիրիաքուն, ո՛չ նրա փաստաբանները նրա գործողություններում որևէ մեղք չեն տեսնում և պնդում են, որ էքս-գործակալն անմեղ է: Բացի այդ, նրանք հրաժարվում են մանրամասն մեկնաբանել հետաքննության ընթացքը` հղում անելով դրա գաղտնիությանը:
