Rosbalt.ru-ի փոխանցմամբ՝ Իրանը տիրապետում է մինչև 20 տոկոս հարստացված մոտ 80 կիլոգրամ ուրանի: Այս մասին նշված է ամերիկյան Կենտրոնական հետախուզական վարչության (ԿՀՎ) պատրաստած զեկույցում: Միջուկային ռումբի ստեղծման համար անհրաժեշտ է 250 կիլոգրամ հարստացված ուրան:
ԿՀՎ-ի զեկույցում ասվում է, որ Իրանը շարունակում է ընդլայնել միջուկային ենթակառույցներն ու ակտիվացնել ուրանի հարստացման գործընթացը: Ամերիկյան հետախուզության տվյալներով՝ նախորդ տարի Իրանն արտադրել է 4.9 տոննա ցածր հարստացված ուրան: 2010 թվականին այդ ցուցանիշը կազմել է 3.2 տոննա, իսկ 2009 թվականին՝ 1.8 տոննա:
Հիշեցնենք, որ փետրվարին հրապարակված ԱԷՄԳ-ի զեկույցում նշված էր, որ Իրանը եռակի ավելացրել է հարստացված ուրանի արտադրությունը, որը կարող է գործածվել միջուկային զենքի ստեղծման համար: