Վրաստանի հայ համայնքը սպասելիքներ ունի ընդդիմության թեկնածու`Բիձինա Իվանիշվիլիից: Այսօր «Առաջին լրատվական»-ի հետ զրույցում նման տեսակետ հայտնեց Թբիլիսիի հայերի ասամբլեայի ղեկավար Առնոլդ Ստեփանյանը`խոսելով հայ համայնքի ներկայացուցիչների և «Վրացական երազանք» դաշինքի առաջնորդ Բիձինա Իվանիշվիլիի հանդիպումից:
Նա տեղեկացրեց, որ այս փուլում հայ համայնքը բոլոր կուսակցություններին մոնիտորինգի է ենթարկում, փորձում պարզել, թե որ կուսակցություններն են աշխատում փոքրամասնությունների հետ և ինչպես են դիտարկում փոքրամասնությունների խնդիրները և դրանց լուծումը: Ըստ նրա` կուսակցությունների ծրագրերի մասին վաղ է խոսել, քանի որ կուսակցությունները շարունակում են աշխատել այս ուղղությամբ, սակայն Առնոլդ Ստեփանյանը նաև չի բացառում, որ կուսակցությունների մեծամասնության ծրագրերում ոչինչ չի լինի փոքրամասնությունների խնդիրների վերաբերյալ: Առնոլդ Ստեփանյանն ասաց, որ այդ երևույթն արդեն ավանդույթ է դարձել: «Կան խոշոր կուսակցություններ, որոնք ընդհանրապես ծրագիր չունեն, սակայն Իվանիշվիլին որոշ քայլեր անում է»,- տեսակետ հայտնեց նա` չբացառելով, որ հայ համայնքի ներկայացուցիչները գալիք ընտրություններում իրենց քվեն տան Բիձինա Իվանիշվիլիին:
Ա. Ստեփանյանի փոխանցմամբ` մոտավորապես տաս օր առաջ Իվանիշվիլին հանդիպել է ադրբեջանական համայնքի հետ, երկու օր առաջ էլ հայերի հետ է հանդիպել: «90-ից ավել մարդ է եղել հանդիպմանը Թիֆլիսից, Ջավախքից, Բաթումից, հասարակական կազմակերպությունների ներկայացուցիչներ, մտավորականներ և այլ ներկայացուցիչներ, նախկին պատգամավորներ և այլն: Հիմնական խոսակցությունները եղել են հայ համայնքի խնդիրների մասին և խոսել են, թե ինչպես կարելի է լուծել այդ խնդիրները: Ընդդիմադիր թեկնածուն իր խոսքի մեջ նշել է, որ այն խնդիրները, որոնք կան հայ-վրացական հարաբերություններում դրանք թյուրիմացություններ են և լուրջ խնդիրներ չեն, կարելի է դրանք լուծել»,- տեղեկացրեց Ա. Ստեփանյանը` հավելելով, որ Իվանաշվիլիի կուսակցությունը ծրագրում է շարունակել հանդիպումները և աշխատել հայ համայնքի հետ:
