Ֆրանսիացի ֆիզիկոսները մշակել են սարքերի աշխատանքի մի սխեմա, որը կարող է շեղել լույսի կամ ձայնի ճառագայթները ցանկացած անկյան տակ: Գիտնականների աշխատանքը հրապարակված է New Journal of Physics ամսագրում:
Հեղինակները որոշել են լույսի հոսքը կառավարելու համար օգտագործել «անտեսանելի» սարքավորումների ստեղծման հիմքում ընկած սկզբունքները:
Ուսումնասիրության հեղինակները փոխել են «անտեսանելի» սարքավորումների ստեղծման համար մշակված մաթեմատիկական ապարատները, որպեսզի կարողանան ստեղծել ոսպնյակների պես լույսի տարածումը շեղող սարքավորումներ: Սակայն, ի տարբերություն դասական ոսպնյակների, այդ սարքերը կարող են շեղել լույսը ցանկացած անկյան տակ, անգամ մինչև լիարժեք պտույտ՝ 180 աստիճանով:
Բացի այդ, հեղինակները կարողացել են ստեղծել լուսային և ձայնային «սև անցքեր», որոնցում տեղի էր ունենում ալիքների լիակատար կլանում:
Այսպիսի էկզոտիկ օպտիկական հատկություններով սարքավորումները կարող են ունենալ բազմազան կիրառություն, որոնցից շատերը դժվար է անգամ կանխատեսել:
«Անտեսանելի» սարքավորումների վրա աշխատանքը հնարավոր է դարձել մետանյութերի գյուտի շնորհիվ, որոնց արտասովոր հատկությունները կախված են ոչ այնքան իրենց կազմից, որքան ներքին կառուցվածքից: