«Թուլուզյան ահաբեկիչ» Մուհամմեդ Մերայի հոր՝ Մուհամմեդ Բենալել Մերայի փաստաբան Զահիա Մոքթարին լրագրողներին պատմել է այն մասին, որ իր տրամադրության տակ կան տեսագրություններ, որոնցում Մերա-կրտսերը խոսում է իր անմեղության մասին: Այս մասին հաղորդում է Le Parisien-ը:
Մոքթարիի խոսքերով՝ ինքն ունի երկու միանման 20 րոպեանոց վիդեոներ, որոնցում Մուհամմեդ Մերան խոսում է ոստիկանների հետ՝ ասելով. «Ինչի՞ համար եք դուք ինձ սպանում։ Ես անմեղ եմ»: Տեսագրությունները փաստաբանին փոխանցել են «իրադարձությունների կենտրոնում գտնվող անձինք, ովքեր ցանկանում են, որ ճշմարտությունը հայտնի դառնա բոլորին»: Միաժամանակ նա Le Parisien–ին տված հարցազրույցում նշել է, որ տեսագրությունը կտրամադրի միայն դատարանին:
Մոքթարին համոզված է, որ ֆրանսիական իրավապահ մարմինները Մերային օգտագործել են իրենց նպատակների համար, այնուհետև նրան ոչնչացրել են, որպեսզի նա իրենց չմատնի:
Փաստաբանը չի ժխտում այն հանգամանքը, որ Մերան սպանություն է կատարել, սակայն պնդում է, որ նրան մանիպուլյացիայի են ենթարկել Ֆրանսիայի իշխանությունները:
Ֆրանսիայի ՆԳՆ–ն դեռ չի մեկնաբանել Մոքթարիի հայտարարությունը:
Մուհամմեդ Մերան զոհվել է մարտի 22-ին, երբ ոստիկանները գրոհել են նրա տունը: Մարտի 21-ին, զանգահարելով France 24 հեռուստաալիք, նա խոստովանել է, որ սպանություններն ինքն է կատարել։ Բացի այդ, գրոհի ժամանակ Մերան պատմել է այն մասին, թե որտեղ կարելի է գտնել սպանությունների տեսագրությունը:
Հիշեցնենք, որ Մերան սպանություններ էր կատարել Թուլուզում և Մոնտոբանում։
