«Մենք վրդովված ենք, որ մշակույթի նախարարը որոշում է կայացրել միացնել Երևանի էստրադային-ջազային պետական քոլեջը մշակույթի պետական քոլեջին: Այն շուրջ 30 տարվա պատմություն ունի, և չի կարելի գրչի մեկ հարվածով ոչնչացնել»,- լրագրողների հետ հանդիպման ժամանակ իրենց բողոքը արտահայտեցին քոլեջի դասախոսները: Մշակույթի նախարար Հասմիկ Պողոսյանի կայացրած որոշման համաձայն` Ակսել Բակունցի տնօրինությամբ գործունություն ծավալող էստրադային-ջազային քոլեջը պետք է միավորվի Նադեժդա Սարգսյանի տնօրինությամբ գործող մշակույթի պետական քոլեջին: Ակսել Բակունցը և մի քանի դասախոսներ փորձել են հանդիպել մշակույթի նախարարի հետ, որն ասել է, թե նման որոշում չի կայացրել, սակայն դասախոսները իրենց ձեռքին ունեն այդ որոշումը, որը հանել են կառավարական կայքից: «Քոլեջը գործում է 1979 թվականից և ունի բազմաթիվ բաժիններ`արվեստի, դերասանական, կոմպոզիտորական և այլն: Մշակույթի քոլեջում բաժինները տարբեր են`օպերատորական, մոդելավորման և, իհարկե, երգեցողության, որովհետև տնօրենը երգչուհի է»,- իր խոսքում նշեց Ակսել Բակունցը: