Սիրիական ոստիկանությունն այսօր ցրել է Դամասկոսի հարավում` Քֆար-Սուսա թաղամասում հավաքված ցուցարարներին: Ինչպես հաղորդել է «Ալ-Ջազիրա» հեռուստաալիքը, բողոքի ակցիան սկսվել է մայրաքաղաքում ուրբաթ օրը անվտանգության ուժերի կողմից սպանված ցուցարարների թաղման արարողությունից հետո:
Ընդդիմադիր ուժերի փոխանցմամբ՝ ցույցը ցրելու նպատակով ոստիկանությունը կիրառել է զենք, որի հետևանքով առնվազն 2 մարդ է մահացել, կան նաև վիրավորներ:
Փողոցային երթեր են կազմակերպվել նաև այլ թաղամասերում, որոնց ընթացքում տեղի են ունեցել անկարգություններ, լսվել են կրակոցներ:
«Ալ-Մուսթակբալ» հեռուստաալիքը հաղորդել է, որ ոստիկանությունը շրջապատել է Դամասկոսի ծայրամասային շրջանները:
Իշխող վարչակարգի հակառակորդները շարունակում են իրականացնել ահաբեկչություններ և սպանություններ: Այսօր Դեր-Զորում ապստամբները գնդակահարել են 17-րդ տանկային բրիգադի հրամանատարին:
SANA գործակալության փոխանցմամբ՝ Թել-Կալաայում` Հոմսից 30 կմ հեռավորության վրա, սիրիացի զինծառայողները կանգնեցրել են դիվերսիոն խումբ, որը Սիրիա էր ներթափանցել Լիբանանից: Գրոհի արդյունքում սպանվել է մի քանի ահաբեկիչ:
