Սիրիայի հակամարտությունը հնարավոր չէ լուծել ռազմական ճանապարհով: Այսպիսի համոզմունք է հայտնել շիական «Հըզբոլլահ» խմբավորման առաջնորդ Հասան Նասրալլահը:
Նասրալլահը, որը համարվում է Դամասկոսի հիմնական դաշնակիցներից մեկը, հայտնել է, որ զինված ընդդիմությանը պայքարի ամբողջ ընթացքում չի հաջողվել տապալել Բաշար Ալ-Ասադի վարչակարգը, իսկ արտաքին ներխուժման՝ օտարերկրյա կամ արաբական զորքեր ուղարկելու թեման «վերջնականապես փակված է ինչպես տարածաշրջանային, այնպես էլ միջազգային մակարդակներով»:
«Ճգնաժամից դուրս գալու միակ տարբերակը եղել և մնում է երկխոսության միջոցով քաղաքական կարգավորումը, և մենք կոչ ենք անում դրան իրադարձությունների հենց սկզբից»,- հիշեցրել է Նասրալլահը՝ դիմելով իր համախոհներին: Նա ակնարկել է, որ մեծ հույս է կապում ՄԱԿ-ի և Արաբական պետությունների լիգայի հատուկ ներկայացուցիչ Քոֆի Անանի առաքելության հետ: Շիա քաղաքական գործչի խոսքերով՝ սկզբունքային պահն այն է, որ նա առաջ չի քաշել Ասադի հեռանալու հարցը:
Նասրալլահը դատապարտել է Արևմուտքին և մի շարք արաբական երկրների ու ընդդիմադիր խմբերի, որոնք փորձում են հեռացնել Սիրիայի առաջնորդին իշխանությունից՝ «նախապայմաններ պարտադրելով»:
«Բոլոր նրանք, ովքեր գիտակցում են Սիրիայում դրությունից խաղաղ ելք փնտրելու անհրաժեշտությունը, պետք է այժմ համագործակցեն քաղաքական երկխոսություն սկսելու համար՝ անկախ այն բանից, թե որ ճամբարում են հանդես գալիս»,- ասել է «Հըզբոլլահի» առաջնորդը՝ ավելացնելով, որ խնդրի քաղաքական լուծումը համապատասխանում է «ոչ միայն Սիրիայի, այլև ամբողջ արաբական ումմայի շահերին»:
