1907թ. այս օրը ծնվեց անվանի կոնյակագործ, հայկական լավագույն կոնյակների ստեղծող, Սոցիալիստական աշխատանքի հերոս (1971թ.), Հայաստանի վաստակավոր ինժեներ (1961թ.) Մարգար Սեդրակյանը:
Ավարտել է Երևանի գյուղատնտեսական ինստիտուտը (1940թ.), 1927-ից ձեռնամուխ է եղել հայկական կոնյակների նոր տեսակների ստեղծմանը, ինչը համաշխարհային ճանաչում է բերել կոնյակագործին:
1935-ից ԽՍՀՄ Համտեսման հանձնաժողովի անդամ էր, 1940-ից՝ Երևանի կոնյակի գործարանի գլխավոր տեխնոլոգը:
Սեդրակյանը ԽՍՀՄ-ում, հատկապես Հայաստանում, կոնյակների պատրաստման նոր տեխնոլոգիայի հիմնադիրն է:
Ստեղծել է «Հոբելյանական» (առաջին բարձր կարգի կոնյակը ԽՍՀՄ-ում), «Դվին», «Երևան», «Նաիրի», «Տոնական», «Ախթամար», ուկրաինական «Ուկրաինա» կոնյակը:
1966թ. Նրան շնորհվում է «Կոնյակի պատրաստման մեծ վարպետ» պատվավոր կոչումը:
Նրա հիշատակին է նվիրված «Վասպուրական» կոնյակը: Նրա ստեղծած կոնյակները կոնյակի միջազգային տարբեր մրցույթներում բազմիցս արժանացել են մրցանակների:
Երևանի կոնյակի գործարանի դիմաց կանգնեցված է նրա հուշարձանը:
Մահացել է 1973թ. հոկտեմբերի 10-ին: