Լատվիայի մայրաքաղաքի կենտրոնում այսօր մահափորձ է կատարվել տեղական компромат.лв ինտերնետ կայքի լրագրող Լեոնիդ Յակոբսոնի դեմ, ով կայքում հրապարակում էր «լրագրողական հետքննության արդյունքներ»: Հրազենային վնասվածքներով Յակոբսոնը հոսպիտալացվել է:
Ինչպես լրագրողներին տեղեկացրել է ոստիկանության ներկայացուցիչը, մահափորձն իրականացվել է լրագրողի տան միջանցքում: Հանցագործը կրակել է գազային ատրճանակից: Պատահարի միակ վկան տուժողի 9–ամյա որդին է: Լրագրողի վիճակը կայուն է: Հետաքննության շահերից ելնելով` ոստիկանությունը դեռևս չի հրապարակել հանցագործության դրդապատճառները:
Ինչպես նշել է Յակոբսոնի գործընկերը, մահափորձը, հավանաբար, կապված է մասնագիտական գործունեության հետ:
Անցյալ տարվա աշնանից компромат.лв կայքը Լատվիայում հայտնի է դարձել Ռիգայի քաղաքապետ Նիլա Ուշակովի էլեկտրոնային նամակագրության հրատարակմամբ: Լրագրողի խոսքերով՝ ինքը ինտերնետ կայքի անանուն հղում է ստացել, որտեղ հրատարակված է եղել տվյալ նամակագրությունը:
Ոստիկանությունն այս գործի հետ կապված՝ 48 ժամով ձերբակալել էր Յակոբսոնին և հետախուզել նրա բնակության վայրը:
Քաղաքապետն, անդրադառնալով Յակոբսոնի դեմ կատարված մահափորձին, ասել է, որ ինքը ցավում է կատարվածի համար, և հավել է, որ ալիբի ունի:
