Իտալիայի երկու բնակիչներ մարտի 29-ին ինքնահրկիզման ճանապարհով ինքնասպանության փորձ են արել։ Այս մասին հաղորդում է Agence France-Presse–ը: Առաջինն իրեն հրկիզել է Ջուզեպպե անունով շինարարը` Բոլոնիայից (նրա ազգանունը դեռ չեն հայտնում): Նա ինքնասպան լինելու մտադրության մասին նամակ է ուղարկել կնոջը, ընկեերներին և հարկային գերատեսչությանը, որից հետո իր վրա բենզին է լցրել ու այրել:
Այրվող մարդուն նկատել և կրակը մարել է ճանապարհային տեսուչը, ով պատահական գտնվել է դեպքի վայրում: Նա շինարարին հասցրել է հիվանդանոց։ Նրա կյանքի համար այժմ բժիշկները պայքարում են:
Երկրորդ միջադեպը տեղի է ունեցել Վերոնայում, որտեղ ինքնասպանության փորձ է արել 27-ամյա արտագնա աշխատողը Մարոկկոյից, ում շինարարական կազմակերպությունը մի քանի ամիս աշխատավարձ չի տվել: Մարոկկացու կրակը ևս հաջողվել է մարել, որից հետո նրան ուղարկել են տեղական կլինիկայում բուժվելու:
Բոլոնիացի իտալացին իրեն հրկիզել է հարկեր վճարելուց խուսափելու համար նշանակված իր դատալսումներից մեկ օր առաջ: Ֆինանսական ոստիկանությունը նրան մեղադրել է 104 հազար եվրո հարկ և տուգանք չվճարելու մեջ, որոնք կուտակվել են 2007 թվականից ի վեր:
Ջուզեպպեն իր թողած նամակում գրում է, որ միշտ վճարել է հարկերը, և իր հասցեին ուղղված մեղադրանքները հարկային մարմիններն են հորինել:
Մեկ օրում երկու ինքնահրկիզման դեպքերն Իտալիայում մեծ ռեզոնանս են առաջացրել, և միանգամից բանավեճներ են սկսվել հարկերը չվճարողների հանդեպ կոշտ միջոցներ կիրառելու նպատակահարմարության մասին:
Երկրի ղեկավարությունը պնդում է, որ այդ միջոցառումները պետք է կատարվեն, քանի որ Իտալիան պարտքային ճգնաժամի մեջ է:
