Կապանի Շահումյան թաղամասի ոսկու բազմամետաղային հանքի բաց եղանակով շահագործման արդյունքում Կապանում պատրաստվում են հատել մոտ 50 000 ծառ: Դրանք այն այգիներն են, որոնք գտնվում են Շահումյան հանքի տարածքի վերևում: Խոշոր ծառահատման դեմն առնելու նպատակով միավորվել են հայաստանյան բնապահպանական կազմակերպությունները` ի դեմս «Էկոլուր» տեղեկատվական ՀԿ-ի, էկոլոգիական հասարակական դաշինքի և «Էկոդար» ՀԿ-ի: Հունվարի 13ին` Երևանի Օրհուս կենտրոնում, շահագրգռված բնապահպանական կազմակերպությունները քննարկել են նախագիծը: Թեև այն դեռ չի ներկայացվել բնապահպանական փորձաքննության, և՛ մարզպետարանը, և՛ Կապանի քաղաքապետը, և՛ կառավարությունը նրա մասին արդեն խոսում են, ինչպես իրականացման հանձնված նախագծի մասին: Իսկ այսօր նշված կազմակերպությունները խնդիրը ներկայացրին լրագրողներին: «Նախագծի իրականացման համար առաջին հերթին հատվելու է 50 հազար ծառ, այսինքն` բոլոր մրգատու ծառերը, որոնք ընկերություւնը գնել է բնակիչներից»,-այս մասին մեզ հետ զրույցում նշեց «Էկոլուր» ՀԿ-ի նախագահ Ինգա Զառաֆյանը: Նշվածի համար, պարզվում է, անհրաժեշտ է միայն հողերի կատեգորիայի փոփոխման կառավար ության որոշում: Որպես կանոն, որոշումն ընդունվում է հետևյալ ձևակերպմամբ` հանրային գերակա շահ ճանաչել հողատարածքը: Այս փաստարկը բերվում է միշտ, երբ մասնավոր ընկերությունը մտադիր է մեծացնել սեփական շահույթը հանրային և ազգային սեփականության` ոսկու, պղնձի, մոլիբդենի, ցինկի, արծաթի, երկաթիև, վերջապես, ուրանի հաշվին: «Մեր նման երկրի համար 50 հազար ծառի հատումը ահավոր մեծ թիվ է և մենք ոչ մի դեպքում նման բան թույլ չենք տա»,- Առաջին լրատվականի հետ զրույցում նշեց էկոլոլոգիական հասարակական դաշինքի համակարգող Սիլվա Ադամյանը: Իսկ առաջիկայում հասարակական դաշինքը պատրաստվում է դիմել Կապանում այս գործընթացն իրականացնող Deno Gold Mining ընկերության Կանադայի գլխամասային գրասենյակ:
