ИТАР-ТАСС-ի փոխանցմամբ՝ Իրանի նախագահ Մահմուդ Ահմադինեժադը Դուշանբեում մասնակցել է Աֆղանստանին նվիրված կոնֆերանսի աշխատանքներին: Իր ելույթում Ահմադինեժադը հայտարարել է, որ ԱՄՆ-ն այլևս չի կարող աշխարհին թելադրել իր պայմանները.
«ՆԱՏՕ-ն և ԱՄՆ-ը պետք է փոխեն իրենց քաղաքականությունը, քանի որ անցել են այն ժամանակները, երբ նրանք կարող էին աշխարհին թելադրել իրենց պայմանները: ՆԱՏՕ-ի և Պակիստանի փոխհարաբերություններում առկա անկայունությունը միայն աճելու է: Աֆղանստանի բոլոր դժբախտությունների պատճառը ԱՄՆ-ի գլխավորած արևմտյան կոալիցիայի զորքերի ներկայությունն է այդ երկրում:
Աֆղան ժողովուրդը սեփական տանը ենթարկվել է հարձակման: Մի՞թե խնդիրը աֆղան ժողովրդի մեջ է: Ողջ խնդիրը ՆԱՏՕ-ի մեջ է, որն ահաբեկչության դեմ պայքարի անվան տակ մտել է Աֆղանստան և այժմ այդ նույն կարգախոսով շրջապատում է Ռուսաստանին ու Չինաստանին»:
Ահմադինեժադը հավելել է, որ Թեհրան-Աշխաբադ երկաթգիծը շահագործման կհանձնվի մինչև տարեվերջ, ինչը մեծ փոփոխություններ կառաջացնի տարածաշրջանում: