Լիբիական աշխարհազորի անդամները մարտի 24-ին Տրիպոլիում գրոհել են թուրքական հյուրանոցը:
Ինչպես հաղորդում է Lenta.ru-ն, «Լյուքս» դասի Rixos հյուրանոցում մինչև վերջին ժամանակները ապրել է աշխարհազորայիններից մեկը` Ալի Դաու Զինթանին: Վերջերս հյուրանոցի ղեկավարությունը նրան խնդրել էր վճարել 6 ամիս հյուրանոցում ապրելու դիմաց կամ` լքել հյուրանոցը: Զինթանին լքել էր հյուրանոցը, բայց շուտով վերադարձել էր մի քանի տասնյակ զինված մարդկանց խմբով:
Աշխարհազորայինները կոտրել են շենքի դուռը, ներս են խուժել և կրակահերթ արձակել: Նախնական տվյալներով` ոչ ոք չի տուժել, սակայն հյուրանոցի գլխավոր մենեջեր Շյուկրյու Կոչակին ծեծել են և առևանգել: Կոչակին ազատել են այն բանից հետո, երբ Թուրքիայի դեսպանատունը բողոքել է աշխարհազորայինների գործողության դեմ:
Լիբիական ժողովրդական անցումային խորհրդի նախագահ Մուստաֆա Աբդել Ջալիլն այսօր նախատեսել էր այցելել Rixos հյուրանոց պաշտոնապես ներողություն խնդրելու համար:
Լիբիայում աշխարհազորայինների մեծաթիվ խմբերը ձևավորվել են Մուամար Քադաֆիի վարչակարգի տապալումից հետո: Նրանք իրենց խնդիրն են համարում կարգի և օրենսդրության պահպանումը, սակայն իրավապահները, այդ թվում` նաև Human Rights Watch կազմակերպությունը աշխարհազորայիններին մեղադրում են բազմաթիվ հանցագործությունների կատարման մեջ:
2011 թվականի սեպտեմբերին Rixos ընկերությունը առաջիններից էր, որ քաղաքացիական պատերազմից հետո վերադարձավ Լիբիա: Սպասվում է, որ Տրիպոլիում թուրքական հյուրանոցը աշխատանքները կվերսկսի մարտի 26-ին: Շյուկրյու Կոչակը նշել է, որ շաբաթ օրվա միջադեպը չի անդրադառնա Լիբիայում գործունեությունը շարունակելու որոշման վրա:
