Այսօր լրագրողների հետ հանդիպմանը անդրադառնալով նախընտրական գործընթացներին՝ ՀՀԿ անդամ, ԱԺ պատգամավոր Լեռնիկ Ալեքսանյանը հայտնեց, որ այսօր նախընտրական լարվածություն գրեթե չկա:
Խոսելով ՀՀԿ համամասնական ցուցակի մասին՝ նա ասաց, որ այս ցուցակը ՀՀ նախագահի գործունեության շարունակությունն է: Ըստ նրա՝ ցուցակը ներկայացուցչական է:
«Անկախ նրանից՝ ներկայացված մարդկանց մենք սիրում ենք, թե ոչ՝ մեր խորհրդարանը պետք է համալրվի արհեստավարժ մարդկանցով: Այն մարդիկ, որոնց տարբեր մակդիրներ են տալիս, ճանապարհ անցած մարդիկ են և ՀՀԿ-ի հետ ունեն գաղափարական հենք: Այսօր ո՞ւմ սատարի Վիկտոր Դալլաքյանը, եթե ոչ՝ Ս. Սարգսյանին: Ո՞վ ասաց, որ նա հետագայում ևս չի քննադատի իշխանությանը: Եթե քննադատել է, չի նշանակում, որ իրավունք չունի պաշտպանելու այդ գիծը: Վ. Դալլաքյանը միշտ եղել է նաև իշխանությունների կողքին և ճիշտ է արել:
Ոչ ոք չի կարող ժխտել, որ Արտաշես Գեղամյանն էլ է լուրջ, փորձառություն ունեցող գործիչ, իսկ Ս. Սարգսյանի նախագահության ժամանակ նա ընդդիմադիր չի եղել:
Մանվել Գրիգորյանը, անկախ կրթական աստիճանից, այս բոլոր լարված ժամանակներում ամենապետական մոտեցումն է դրսևորել: Նրա դիրքորոշումը շատ կարևոր է եղել ներքաղաքական պայքարի առումով:
Սամվել Ալեքսանյանը և Ռուբեն Հայրապետյանն ընտրվում են մեծամասնական ընտրակարգով, այդ մարդիկ ազդեցություն ունեն իրենց ընտրատարածքների վրա: Նրանք կարող են ինչ-որ բան փոխել, ուրեմն ինչո՞ւ չլինեն համամասնական ցուցակում»,- ցուցակը մեկնաբանեց Լ. Ալեքսանյանը։
ՀՀԿ գործիչը տեղեկացրեց, որ հավատում է՝ իշխանությունները կցուցաբերեն փոփոխություններ կատարելու կամք: Ըստ նրա՝ այդ առումով կան ֆիքսված մեխանիզմներ:
«Այսօր նախընտրական լարվածություն գրեթե չկա. սա իշխանության նվաճումն է։ Իհարկե, առկա է քննադատություն, այսօր լուրջ ակցիաներ են իրականացնում բնապահպանները, և ՀՀ նախագահը այդ ամենը հաշվի է առնում»,- եզրափակեց Լ. Ալեքսանյանը:
