Այսօր՝ ժամը 12.00-ին, Վանաձորի Շառլ Ազնավուրի անվան մշակութային կենտրոնի դիմաց Թեղուտի պաշտպանության խումբը կկազմակերպի ակցիա` ի պաշտպանություն Թեղուտի: Այս մասին տեղեկացնում են «Փրկենք Թեղուտը» բնապահպանական քաղաքացիական նախաձեռնության ակտիվիստ երիտասարդները:
Հիշեցնենք, որ ՀՀ վարչապետի 13.03.2012 թ. թիվ 212-Ա որոշմամբ ստեղծվել է աշխատանքային խումբ, որն այսօր քաղաք Վանաձորում պետք է կազմակերպի 2-ժամյա հանրային քննարկում Թեղուտում հանքի շահագործման առանձին դետալներ քննարկելու համար: Բնապահպանական քաղաքացիական նախաձեռնությունները հանրային քննարկմանը մասնակցելու հրավեր են ստացել, սակայն մերժել մասնակցությունը, քանի որ պարզ չէ, թե ինչ նպատակ է հետապնդում հանրային քննարկումը, ինչ արդյունքներ են լինելու, ինչ օրակարգ է նախատեսված, և ովքեր են բանախոսները:
Ավելի վաղ «Առաջին լրատվական»-ի հետ զրույցում «Թռչկան» քաղաքացիական նախաձեռնության անդամ, իրավաբան Արթուր Գրիգորյանն ասել էր, որ հաշվի չեն առնվում և մինչև օրս ի կատար չեն ածվում Հայաստանի վերաբերյալ ընդունված Օրհուսի կոմիտեի որոշումները: Ըստ նրա` Թեղուտում հանքի շահագործման համար ձեռք բերված բոլոր լիցենզիաները ապօրինի են: Նրա համոզմամբ` սա պետք է դարձնել քննարկման առարկա:
Հիշեցնենք, որ Թեղուտի հանքի շահագործման թույլտվությունը ՀՀ կառավարությունը տվել է դեռևս 2007 թվականին: Հանրային քննարկումը առնվազն 5 տարով ուշացած է՝ ըստ ակտիվիատների: Նրանք պահանջում են կառավարությունից դադարեցնել անօրինական ծրագիրը: «Թեղուտը մեր հանրային ունեցվածքն է, մեր հանրային սեփականությունը: Թեղուտը պատկանում է ՀՀ ժողովրդին: Այն նաև համամարդկային հարստություն և ժառանգություն է: Թեղուտը հանք չի դառնալու»,- նշում են բնապահպան երիտասարդները:
