Վանի ուժեղ երկրաշարժից հետո սեյսմիկ ակտիվությունը բնական է: Այսօր «Առաջին լրատվական»-ի հետ զրույցում ասաց սեյսմոլոգ Վլադիմիր Բալասանյանը`անդրադառնալով վերջին շաբաթվա ընթացքում տեղի ունեցած երկրաշարժերին:
Դիտարկելով 2012 թվականը` նա ասաց, որ տարեսկզբից մոտավորապես 50 երկրաշարժ է գրանցվել և՛ հանրապետության ներսում, և՛ հանրապետության սահմանամերձ շրջաններում` Վրաստան, Ադրբեջան, Թուրքիա և Պարսկաստան: Ըստ սեյսմոլոգի` հաշվի առնելով այս տվյալը՝ արդեն վաղուց պետք է տագնապ հայտարարած լինեինք, բայց դրանք բոլորը դասվում են Վանի ուժեղ երկրաշարժի հետցնցումներին:
«Եթե սկզբնական շրջանում հետցնցումները կենտրոնացած էին հիմնական օջախի շուրջը, ապա ժամանակի ընթացքում հետցնցումները սկսում են տարածվել ամբողջ տարածաշրջանով: Պարզ է, որ այդպիսի ուժեղ ցնցումն, ինչպիսին Վանի երկրաշարժն էր, ամբողջ տարածաշրջանի վրա է անդրադառնում, որովհետև ընդհանուր լարվածության դաշտը ռեգիոնում այդպիսի ուժեղ ցնցումից անպայման փոխվելու էր, և ինչ-որ որոշակի վերադասավորություններ պետք է տեղի ունենային գեոդինամիկական տեսակետից»,- մեկնաբանեց սեյսմիկ ակտիվությունը Վլադիմիր Բալասանյանը:
Ներկայացնելով սեյսմիկ ակտիվության հաջորդ հիմնավորումը` նա ասաց, որ շատ ավելի վտանգավոր կլիներ, եթե տարածաշրջանում թույլ ցնցումների շարք չլիներ: Սեյսմոլոգի խոսքով` դա կարելի էր վերագրել այն բանին, որ ուժեղ երկրաշարժ է նախապատրաստվում: Ուստի Վլադիմիր Բալասանյանը վստահեցրեց, որ տագնապի առիթ չկա:
Հիշեցնենք, որ վերջին շրջանում Հայաստանում և տարածաշրջանում սեյսմիկ ակտիվություն է նկատվում: Վերջին 7 օրերի ընթացքում գրանցվել է երկու երկրաշարժ, իսկ տարածաշրջանում` 13 երկրաշարժ:
