Ինչպես արդեն տեղեկացրել էր «Առաջին լրատվականը», Աֆղանստանում Իրանի դեսպանը Քաբուլի իշխանություններից պահանջել էր ձերբակալել Իրանի դեսպանատան առջև բողոքի ցույցի կազմակերպիչներին: Աֆղանցի ցուցարարները, ի նշան բողոքի Իրանի կողմից Աֆղանստանի սահմանը փակելու և վառելանյութի հոսքը դեպի Աֆղանստան կանխելու դեմ, ցույց էին կազմակերպել Իրանի դեսպանատան շենքի առջև, այրել էին Իրանի առաջնորդ Այաթոլահ Խամենեիի լուսանկարներն ու բացականչել՝ «Մա՛հ Իրանի Իսլամական Հանրապետությանը», «Մա՛հ Ահմադինեժադին», «Մա՛հ Խամենեիին»:
Երբ Իրանի դեսպանը այդ միջադեպից հետո Աֆղանստանի իշխանություններից պահանջել էր ձերբակալել ցուցարարներին, Աֆղանստանի պետական ԶԼՄ-ների կենտրոնի խորհրդատու Ռաֆի Ֆիրդոսը «BBC Persian» հեռուստաալիքի հետ զրույցում հայտարարել է. «Խոսքի ազատությունն ու բողոքելու իրավունքը ամրագրված են Աֆղանստանի Սահմանադրության մեջ, և իշխանությունները չեն ցանկանում օրենքին հակառակ գործել: Քաբուլը Թեհրան չէ, ու Սահմանադրությամբ հաստատված խոսքի ազատության իրավունքը բոլորին թույլ է տալիս ազատորեն խոսել ու բողոքել իրենց հուզող խնդիրների մասին»։