Հայաստանի խոշորագույն գործարարներից մեկին՝ ԲՀԿ ղեկավար Գագիկ Ծառուկյանին պատկանող «Մուլտի Գրուպ» կոնցեռնը 2011թ. 2010-ի համեմատ գրեթե քառապատկել է վճարած հարկերը՝ մոտ 100.8 մլն դրամից հասցնելով 375 մլն դրամի, սակայն 1000 խոշոր հարկատուների ցուցակում զբաղեցնում է ընդամենը 225-րդ տեղը: Սա այն դեպքում, երբ 2010-ի համեմատ անցած տարի Մուլտի Գրուպ կոնցեռնը դիրքերը բարելավել է միանգամից 492-ով՝ վեր բարձրանալով 717-րդ հորիզոնականից:
Գ.Ծառուկյանին պատկանող «Արարատցեմենտ» գործարանը նույնպես բարելավել է հարկային ցուցանիշները՝ 2011-ին բյուջեն հարստացնելով 1 մլրդ 54 մլն դրամով՝ 2010-ի 375 մլն դրամի փոխարեն և 93-րդ տեղից բարձրանալով 75-րդ տեղը:
Հարկային վճարումները որոշ չափով ավելացրել է Գ.Ծառուկյանին պատկանող և իր խոշորությամբ աչքի ընկնող մյուս ձեռնարկությունը՝ Երևանի Արարատ կոնյակի-գինու-օղու կոմբինատը: Այսպես՝ 2010թ. 634 մլն դրամի փոխարեն 2011-ին բյուջե է վճարել 646 մլն դրամ:
Հարկային ցուցանիշների այս բարելավումը բնական է, քանի որ համաշխարհային ֆինանսատնտեսական ճգնաժամից հետո Հայաստանում բոլոր ձեռնարկությունները, ամեն դեպքում՝ իշխանական թևի ներկայացուցիչներին պատկանող, աճ են արձանագրել: Սակայն թե ինչպիսի՞ն կլիներ իրական պատկերը, եթե տեսականորեն մեր երկրում չլիներ հովանավորչություն կոչեցյալը, հայտնի է հարկային մարմնին և ներքին հաշվապահություն վարողներին: Իսկ Գ.Ծառուկյանի բիզնեսների շարքն անվերջ կարելի է թվարկել՝ «Մուլտի Գրուպ Սթոուն», «Արգեյմ», «Երևանի քիմիադեղագործական ֆաբրիկա», «Բաղրամյանի հացամթերքներ», «Կլեոպատրա», «Մուլտի Գոլդ», «Քվանատոնոր Օմեգա», «Արնամենտ», «Ջի էմ մաղարո», «Քինգ մարոն բիչ» և այլն, և այլն:
ԲՀԿ համագումարում Գագիկ Ծառուկյանն ու իր թիմակիցները զարմանալիորեն ճիշտ բնութագրեցին երկրի իրավիճակը` միջավայրի և պայմանների բացակայություն՝ հարկային անհավասար պայմաններ, անտերության մատնված փոքր ու միջին բիզնես, գործազուրկների մեծացող բանակ և արդյունքում` արտագաղթի ահագնացող ծավալներ, որի հետևանքով 3 միլիոնի հոգեբանական շեմից ՀՀ բնակչությունը հեռացել է , և պաշտոնական տվյալներով, 2 միլիոն 871 հազար մարդ կա երկրում, իսկ եթե իրավիճակը կտրուկ չփոխվի, ոչ հեռու ապագայում մենք արդեն նվազած կլինենք 2.5 միլիոնի շեմից:
Զարմանալիորեն ճիշտ… քանի որ ԲՀԿ-ականները մոռացան նշել, որ այս իրավիճակի համար պատասխանատու են հենց իրենք` կոալիցիայի մաս կազմող և անցած 5 տարիներին ՀՀ համար որոշումներ ընդունող Բարգավաճ Հայաստան կուսակցությունը: Երկրում ամենակոռումպացված ոլորտներից մեկը առողջապահությունն է` ՀՀ առողջապահության նախարար Հարություն Քուշկյանը ԲՀԿ անդամ է: ԲՀԿ անդամ է այդքան պահանջված աշխատատեղերի և սոցիալական խնդիրների լուծման պատասխանատուն՝ ՀՀ աշխատանքի և սոցիալական հարցերի նախարար Արթուր Գրիգորյանը: 24 տարի անց դեռ «աղետի գոտի» կոչվող և բնակարանաշինության հարցի լուծման պատասխանատուն` ՀՀ քաղաքաշինության նախարար Վարդան Վարդանյանը նույնպես ԲՀԿ անդամ է: Էլ չասած, որ անցած տարիներին ԲՀԿ-ին են վստահված եղել սպորտի և երիտասարդության հարցերը` նախարար Արթուր Պետրոսյան:
Ծուռ նստենք, ուղիղ խոսենք: Առջևում ընտրություններ են, և ՀՀ քաղաքացին ինքը կտա անցած տարիներին իշխող կոալիցիայի, այդ թվում և ԲՀԿ-ի, կատարած աշխատանքի գնահատականը:
