«Մի լուծում կա, որ կարող եմ առաջարկել այս կառավարությանը»,- այսօր լրագրողների հետ հանդիպման ժամանակ ասաց նախկին վարչապետ Հրանտ Բագրատյանը: «Արտահանել մարդկանց: Քանի որ այս կառավարությունը չի կարող զբաղվել իրական տնտեսական քաղաքականությամբ, թող մարդկանց արտագաղթը փոխարինի մարդկանց արտահանմամբ` կազմակերպված: Յուրաքանչյուր արտահանված մարդ հանրապետությանը միջին հաշվով բերում է 4000 դոլար: Մենք դեկտեմբերին 400 մլն ստացանք: Հիմա այսպիսին է էս ժողովուրդը, լավ կլիներ, որ չուղարկվեր այդ փողը, որ այստեղ այս ժողովուրդը զբաղվեր պետությունը «դզելով»: Բայց քանի որ այդ փողը գալիս է, և դա միակ փողն է, որ մեզ պահում է, մանրածախ ապրանքաշրջանառության 2/3-ը այդ փողով է իրականացվում, եկեք կազմակերպենք մարդկանց արտահանում»,- ասաց Հ. Բագրատյանը: Ըստ նրա՝ արտասահմանյան վարկեր վերցնելու փոխարեն, կարելի է այդ փողը ստանալ մարդկանց արտահանումից: «Օրինակ` այս տարի 300 մլն դոլար նոր պարտք վերցնելու փոխարեն ես առաջարկում եմ արտահանել ևս 80 հազար մարդու, ինչ է եղել որ: 2010-ին 100 հազար ենք արտահանել, այս տարի թող լինի 180 հազար: Պետության բյուջեից էլ տոմսի կեսի փողը տանք այս մարդկանց: Մեկ է, նրանք տասնապատիկ կփոխհատուցեն: Ամենաէֆեկտիվը այս կառավարության գործառույթների մեջ մարդկանց արտահանումն է ստացվել: Ես հաշվել եմ արդյունավետության գործակիցներով: Կամ էլ իրանց պետք է փոխել, որ գա նորմալ մի կառավարություն ու կարգին տնտեսական քաղաքականություն իրականացնի»,- ասաց նախկին վարչապետը: