Վատիկանը դատապարտել է ԱՄՆ կողմից Կուբայի շրջափակման փաստը: Այս մասին հայտարարել է Վատիկանի հատուկ ներկայացուցիչ Ֆեդերիկո Լոմբարդին` «Ազատության կղզի» Հռոմի պապի այցելության նախօրեին: Սպասվում է, որ Բենեդիկտոս 16-րդը Կուբա կայցելի մարտի 26-28-ը: Սա Վատիկանի ղեկավարների` Կուբա կատարած երկրորդ այցելությունն է: 14 տարի առաջ հովվական առաքելությամբ այստեղ էր ժամանել Հովհաննես Պողոս Երկրորդը:
«Սուրբ աթոռը գտնում է, որ էմբարգոյի հետևանքները տառապանք են պատճառում մարդկանց, և այն չի ծառայում բարու տարածմանը»,- ասել է Լոմբարդին, որի խոսքերը մեջբերել են կուբայական թերթերը: Լոմբարդին հավելել է, որ էմբարգո կիրառելը սխալ է և անարդյունավետ, սակայն չի նշել, թե Բենեդիկտոս 16-րդն իր այցելության ժամանակ պատրաստվո՞ւմ է արդյոք անդրադառնալ այս հարցին:
Հիշեցնենք, որ վերջերս Կուբայի իշխանությունները հաշվարկել էին այն վնասը, որն առաջացել էր ԱՄՆ կողմից 1961թ.-ից ընդունված պատժամիջոցների հետևանքով: Այդ գումարը կազմել էր 104 մլրդ դոլար: