ԱՄՆ Իլինոյս նահանգի նախկին նահանգապետ Ռոդ Բլագոևիչին տեղափոխել են Դենվերի (Կոլորադո նահանգ) դաշնային ուղղիչ հաստատություն, որտեղ նախկին քաղաքական գործիչը կանցկացնի 14 տարի,- հաղորդում է ABC News-ը:
Բլագոևիչը մեղադրվում է խաբեության, շանտաժի և դրամաշորթության մեջ: Նրան երեք ամիս ժամանակ էին տվել՝ կնոջը և երկու դուստրերին հրաժեշտ տալու համար: «Ցտեսություն ասելն ամենածանր բանն էր, որ ես երբևէ ստիպված եմ եղել անել,- ասել է նախկին նահանգապետը:- Մինչ նոր հանդիպում»:
Ազատության մեջ անցկացրած իր վերջին օրը Բլագոևիչը ԶԼՄ-ների ներկայացուցիչներին հրավիրել է «հրաժեշտի» մամուլի ասուլիսի, և ինչպես նշվում է, չափազանց գոհ է եղել, երբ նրա տանը հավաքվել է շուրջ 300 լրագրող: Իր ելույթում նա ներողություն է խնդրել նահանգի բանկիչներից՝ նշելով այնուամենայնիվ, որ իր պաշտոնավարման ընթացքում ամեն ինչ արել է օրենքի սահմաններում, և որ «ճշմարտությունը վերջին հաշվով կհաղթի»:
Սերբական ծագմամբ քաղաքական գործչի շուրջ սկանդալ բռնկվեց 2008 թ. դեկտեմբերին, երբ հայտնի դարձավ, որ նա փորձել է դրամական պարգև ստանալ մի հարցի որոշման մասնակցելու համար, որով պետք է վճռվեր, թե Սենատում Օբամայից հետո ով կզբաղեցնի նրա տեղը: Բլագոևիչը պաշտոնից հեռացվել է 2009 թ., երբ Սենատը նրան իմփիչմեթ հայտարարեց:
