Իրանական IRNA լրատվական գործակալության փոխանցմամբ՝ Իրանի ու նրա միջուկային ծրագրի հարցում միջազգային միջնորդ հանդիսացող «Վեցյակի» միջև բանակցությունները կվերսկսվեն շուտով: Այս մասին այսօր հայտարարել է Իրանի ԱԳՆ-ի պաշտոնական ներկայացուցիչ Ռամին Մեհմանփարաստը:
Վերջինիս խոսքերով՝ Իրանի Ազգային անվտանգության բարձրագույն խորհրդի քարտուղար Սեյեդ Ջելալին ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնին հասցեագրած իր նամակում նշել է բանակցություններին իրանական կողմի պատրաստակամ լինելու մասին:
Մեհմանփարաստը, սակայն, չի նշել բանակցությունների անցկացման ստույգ ժամկետը՝ ընդգծելով, որ առաջարկվել է դրանք անցկացնել Ստամբուլում:
Հիշեցնենք, որ փետրվարի վերջին Թուրքիայի արտգործախարար Ահմեդ Դավութօղլուն հայտարարել էր, որ Իրանի ու «Վեցյակի» միջև բանակցությունները վերսկսվելու են ապրիլին, և որ Թուրքիան պատրաստ է հյուրընկալել դրանք:
