ՀԱՕԿ-ի լրատվության բաժինը տեղեկացնում է, որ որոշ լրատվամիջոցներ մեկնաբանել են ՀՖՖ նախագահ Ռուբեն Հայրապետյանի՝ վեջերս արած հայտարարությունն այն մասին, թե ՀԱՕԿ-ն իրավունք չուներ առանց ֆուտբոլի ֆեդերացիային տեղյակ պահելու պայմանագիր կնքել ռուսական Forward ընկերության հետ:
Հայաստանի ազգային Օլիմպիական կոմիտեն պաշտոնապես հայտարարում է, որ առանց ՀԱՕԿ-ի հաստատման մարզաձևերի հանրապետական ֆեդերացիաները (ՀՖՖ-ն նույնպես) չեն կարող մասնակցել Oլիմպիական խաղերի: Ավելին, ՀԱՕԿ-ը բացառիկ իրավունք ունի ներկայացնել հանրապետությունն Օլիմպիական խաղերում, ՄՕԿ-ի կողմից հովանավորված տարածքային, մայրցամաքային և համաշխարհային համալիր մրցումներում:
ՄՕԿ-ի հռչակագրով (4-րդ գլուխ, կետ 29) ազգային ֆեդերացիաները պետք է ճանաչված լինեն ազգային Օլիմպիական կոմիտեի կողմից և անդամակցեն նրան: ՀԱՕԿ-ը նաև իրավունք ունի ՄՕԿ-ի կողմից ճանաչված միջազգային մարզական ֆեդերացիաներից հետ կանչել ՀԱՕԿ-ի կողմից երաշխավորված ազգային ֆեդերացիաներին:
Օլիմպիական խաղերի մրցասպարեզներում մասնակիցները, նրանց թվում ` հայաստանցիները, հանդես են գալիս մասնագիտական գույքով և հանդերձանքով։ Սակայն Օլիմպիական խաղերում ֆուտբոլիստները կամ այլ մարզաձևի ներկայացուցիչներ կարող են չկրել Forward-ի հանդերձանքը:
Փոխարենը մրցաբեմից դուրս ամենուրեք մեր պատվիրակները պարտավոր են կրել այն մարզահագուստը, որը նրանց կհատկացնի ՄՕԿ-ի հետ համագործակցող ընկերությունը։ Հակառակ պարագայում, նույնիսկ աննշան խախտումների դեպքում Forward-ը տուգանքներ կներկայացնի մեր ազգային Օլիմպիական կոմիտեին:
ՀԱՕԿ-ը ցանկանում է, որ վերելք ապրող հայրենական ֆուտբոլը կարողանա նվաճել նաև Օլիմպիական խաղերին մասնակցության ուղեգիր: Այդ անելն ավանդույթներով հարուստ հայկական ֆուտբոլում հնարավոր է, իսկ պայմանագրերը արգելք չեն հանդիսանա:
