Новости-Армения գործակալության փոխանցմամբ՝ Ղարաբաղա-ադրբեջանական շփման գծում ԵԱՀԿ-ի իրականացրած դիտարկումն անցել է առանց միջադեպերի, սակայն Ադրբեջանը ԵԱՀԿ առաքելությանը դուրս չի բերել իր առաջապահ դիրքեր։ Այս մասին հաղորդում է ԼՂՀ ԱԳՆ մամուլի ծառայությունը:
Դիտարկումն անցել է Լեռնային Ղարաբաղի Հանրապետության իշխանությունների հետ նախօրոք ձեռք բերված պայմանավորվածության համաձայն՝ Լեռնային Ղարաբաղի և Ադրբեջանի զինված ուժերի շփման գծի Մարտակերտի շրջանի Սեյսուլան բնակավայրի ուղղությամբ:
Դիտարկման ընթացքում կրակի դադարեցման ռեժիմի խախտումներ չեն արձանագրվել: Սակայն ադրբեջանական կողմը ԵԱՀԿ առաքելությանը դուրս չի բերել իր առաջապահ դիրքեր` նախօրոք համաձայնեցված կետ, որի հետևանքով ԵԱՀԿ դիտարկման խմբերը ստիպված են եղել դիտարկում կատարել ավելի հեռու տարածությունից:
ԼՂՀ պաշտպանության բանակի դիրքերից դիտարկումն իրականացրել են ԵԱՀԿ գործող նախագահի անձնական ներկայացուցչի դաշտային օգնականներ Խրիստո Խրիստովը (Բուլղարիա) և Անթալ Խերդիչը (Հունգարիա):
Շփման գծի հակառակ կողմից դիտարկումն իրականացրել են ԵԱՀԿ գործող նախագահի անձնական ներկայացուցչի դաշտային օգնականներ Ուիլյամ Փրայորը (Մեծ Բրիտանիա),
Մարիուս Պուձիունասը (Լիտվա) և ԵԱՀԿ գործող նախագահի անձնական ներկայացուցչի գրասենյակի կոորդինատոր Փիթեր Կին (Մեծ Բրիտանիա):
Դիտարկման առաքելությանը ղարաբաղյան կողմից ուղեկցել են ԼՂՀ արտաքին գործերի նախարարության և պաշտպանության նախարարության ներկայացուցիչները:
