Այսօր լրագրողների հետ հանդիպմանը մաշկաբան, սեռավարակաբան Կարեն Վարդանյանը անդրադարձավ սեռական դաստիարակությանը և խոսեց այն մասին, թե որ տարիքից պետք է սեռական հարաբերություններ ունենալ:
Ըստ նրա՝ մինչև 24 տարեկանը խորհուրդ չի տրվում զբաղվել սեռական կյանքով, որովհետև այդ դեպքում խաթարվում է սեռական հասունացումը: Նա նշեց, որ հաճախ իրականացվում են ակցիաներ և անչափահասների ներկայությամբ բաժանվում պահպանակներ, ինչը անթույլատրելի է: Սեռավարակաբանի համոզմամբ՝ այսպիսի ակցիաները պետք է լավ մշակված և կազմակերպված լինեն:
Համատեղ ասուլիսի ընթացքում հոգեբան Սամվել Խուդոյանը նշեց, որ միայն Հայաստանում կարելի է հանդիպել 40-ամյա կույսերի։ Ըստ նրա՝ սա նույնպես արտահայտությունն է այն բանի, որ մեզ մոտ սեռական դաստիարակությունը պատշաճ մակարդակի վրա չէ: Նրա խոսքով՝ սեռական դաստիարակությամբ շատ վաղ պետք է զբաղվել, այն պետք է ուղղված լինի խնդիրները հաղթահարելու:
«Երբեմն տղան նույնանում է մոր հետ և սկսում դրսևորել կանացի հատկանիշներ։ Մինչդեռ դեռահասության շրջանում շատ լուրջ ուշադրություն պետք է դարձվի սրան: Հատկապես բուհերում պետք է մտցնեն ընտանեկան կյանքի նախապատրաստման, սեռական կյանքի էթիկայի մասին առարկաները: Ես չեմ հանդիպել որևէ ընտանիքի, որը սեռական հարաբերությունների խնդիրներ չունենա»,- նշեց Ս. Խուդոյանը՝ հավելելով, որ իր հաճախորդներից ոմանք նաև ասել են, թե ամիսներով, տարիներով սեռական հարաբերություն չեն ունեցել:
Ըստ նրա՝ սա ևս սեռական դաստիարակության խնդիրներից է. զույգերը չգիտեն՝ ինչպես այս թեմայի շուրջ խոսել միմյանց հետ և լուծել իրենց պրոբլեմները: Կարեն Վարդանյանը նաև հավելեց. երբեմն դիմում են զույգեր՝ ասելով, թե կինը չի հղիանում, սակայն հետազոտության արդյունքում պարզվում է, որ նրանք ունեցել են միայն անալ հարաբերություններ:
«Նմանատիպ դեպքեր նույնպես հանդիպում են Հայաստանում: Այս ամենի մասին մարդիկ պետք է տեղեկացված լինեն՝ մինչ ինտերնետից ապատեղեկատվություն ստանալը, որից Հայաստանում շատ են օգտվում և սխալ տեղեկություն ստանում»,- մեկնաբանեց սեռավարակաբանը:
ԿԳՆ հանրակրթության վարչության գլխավոր մասնագետ Անահիտ Մուրադյանը տեղեկացրեց, որ բոլոր հանրակրթական դպրոցների բարձր դասարանների աշակերտները անցնում են «Առողջ ապրելակերպ» առարկան, որը որպես պաշտոնական դասընթաց մուտք է գործել 2007 թվականին:
«Բարձր դասարաններում ֆիզիկական պատրաստություն առարկայից 14 ժամ հատկացնում ենք «Առողջ ապրելակերպ»-ին: Մեթոդներն են՝ զրույց, բանավեճ, քննարկումներ, ունենք ուսումնական ձեռնարկներ։ Անդրադառնում ենք նաև ծխախոտի, թմրանյութերի, ՄԻԱՎ-ՁԻԱՀ-ի թեմաներին և այլ հարցերի»,- նշեց Ա. Մուրադյանը՝ հավելելով, որ դասընթացի նպատակը երեխաների ունեցած տեղեկության համակարգումն է և առաջին սեռական փորձը որքան հնարավոր է՝ հետաձգելը։
