Associated Press-ի հաղորդմամբ, այսօր Աբու Դաբիում հայտնի են դարձել սպորտային ամենահեղինակավոր Laureus World Sports մրցանակի թեկնածուները: 2010 թվականի լավագույն մարզիկի մրցանակին հավակնում են` աշխարհի թիվ մեկ թենիսիստ իսպանացի Ռաֆայել Նադալը, Ֆորմուլա 1-ի հաղթող գերմանացի Սեբաստիան Ֆետտելը, ֆիլիպինցի բռնցքամարտիկ Մեննի Պակիաոն, ամերիկացի բասկետբոլիստ Քոբի Բրայանտը և «Բարսելոնա»-ի ֆուտբոլիստներ իսպանացի Անդրես Ինիեստան ու արգենտինացի Լիոնել Մեսսին: Լավագույն կին մարզիկ անվանակարգում ընդգրկվել են` թենիսիստուհիներ Սերենա Ուիլյամսը` ԱՄՆ-ից, Քիմ Քլայսթերսը` Բելգիայից և Կարոլին Վոզնյաչկին` Դանիայից, ամերիկուհի լեռնադահուկորդ Լիդսի Վոնը, թեթևատլետներ Ջեսիկա Էնիսը` Անգլիայից և Բլանկա Վլասիչը` Խորվաթիայից: Հիշեցնենք, որ World Sports Awards մրցանակը, որին նաև «սպորտային Օսկար» են անվանում, տրվում է 2000 թվականից: