Վլադիմիր Պուտինը երբեք չի բացառել ընդդիմության կառուցողական տրամադրված ներկայացուցիչների հետ երկխոսություն վարելու հնարավորությունը և պատրաստ է սկսել դա նախագահական ընտրություններում հաղթանակից հետո: Այս մասին լրագրողներին հայտնել է Պուտինի մամուլի քարտուղար Դմիտրի Պեսկովը:
«Եթե լինի որևէ կառուցողական դիրքորոշում, որը կօգնի ընդհանուր գործին, բնականաբար, նա պատրաստ կլինի երկխոսության՝ ում հետ պատահի»,- ասել է նա:
«Պուտինը եղել է, կա և կմնա բացարձակապես պրագմատիկ և՛ քաղաքականության, և՛ բոլոր մյուս ոլորտներում»,- ասել է Պեսկովը, որի խոսքերը մեջբերում է gazeta.ru-ն:
Նոր քաղաքական բարեփոխումների հավանականության մասին հարցադրմանը Պեսկովը պատասխանել է. «Դժվարանում եմ ասել»:
Պեսկովը հայտարարել է, որ առաջիկա օրերին Պուտինը կհավաքի լրագրողներին և կպատասխանի նրանց բոլոր հարցերին: «Լրագրողների հետ հանդիպումը պարտադիր կլինի: Համաձայնեք, ճիշտ չէր լինի մամուլի ասուլիս հրավիրել գիշերվա ժամը մեկին: Մենք չենք կասկածում, որ կկարողանանք իրականացնել այդ խոստումը ամենամոտ ժամանակներս»,- ասել է Պեսկովը:
