Նորվեգիայի դատախազությունը կասկածում է, որ Անդերս Բրեյվիկը, ով ներկա դրությամբ մեղադրվում է Օսլոյում 2011 թ. հուլիսի 22-ին իրագործված կրկնակի ահաբեկչության մեջ, հոգեկան հիվանդ է։ Հետևաբար նա չի կարող պատասխանատվություն կրել վերոնշյալ հանցագործության համար։ Այս մասին ուրբաթ օրը հաղորդել է France Press գործակալությունը:
Ինչպես նշվում է դատախազության հայտարարության մեջ, որոշումը կարող է փոխվել, եթե հոգեբուժական փորձաքնության ընթացքում Բրեյվիկի վիճակի մասին նոր մանրամասներ հայտնվեն: Եթե փորձաքննությունը հաստատի, որ Բրեյվիկը հոգեկան հիվանդ է, նա կարող է խուսափել բանտից:
Փետրվարի վերջին նորվեգական «Դիկեմարկ» բժշկական կլինիկայի վեց մասնագետներ Բրեյվիկին ենթարկել են կրկնակի փորձաքննության: Փորձաքննությունը, որը կտևի մոտ 4 շաբաթ, անցկացվում է բանտում, որտեղ գտնվում է Բրեյվիկը:
2011 թ. հուլիսի 22-ին Նորվեգիայում տեղի ունեցած ահաբեկչության զոհ էր դարձել 77 մարդ: Նորվեգացի Անդերս Բրեյվիկն առաջին հարցաքննություններից հետո անմիջապես խոստովանել է, որ ահաբեկչություններ է իրագործել, սակայն իրեն մեղավոր չի ճանաչել: Անդերս Բրեյվիկի դատավարությունը կսկսվի 2012 թվականի ապրիլի 16-ին:
