Մարտի 3-ին Մաշտոցի պուրակում տեղի կունենա խոշոր բնապահպանական ֆորում: Այս մասին Facebook սոցիալական ցանցում տեղեկացնում է բնապահպանական ակտիվիստ Ռուզաննա Գրիգորյանը:
Ըստ Մաշտոցի պուրակի ակտիվիստների` մարտի 3-ին լրանում է Մաշտոցի պուրակում ընթացող քաղաքացիական պայքարի 22-րդ օրը: Յուրաքանչյուր ոք, ով միանում է այս պահանջին, մարտի 3-ին, ժամը 3-ին Մաշտոցի պուրակում իր ներակայությամբ կարող է ապացուցել, որ հանրային սեփականության համար մղվող պայքարի թիկունքին իսկապես կանգնած է հանրությունը՝ ի դեմս Հայաստանի Հանրապետության ինքնորոշված քաղաքացու:
Ֆորումի ընթացքում կքննարկվեն երկրում առկա բնապահպանական, հանրային ունեցվածքի և սեփականության հարցերը՝ հիմք ընդունելով մեր սահմանադրական իրավունքները: Կներկայացվեն հանքարդյունաբերության, մասնավորապես՝ Թեղուտի, Քաջարանի, Ջերմուկի, հանրային կանաչ տարածքների, Շրջակա միջավայրի վրա ազդեցության փորձաքննության օրինագծի հետ կապված խնդիրները և դրանց լուծման հնարավոր եղանակները:
Մաշտոցի պուրակի «պաշտպանները» հորդորում են ապացուցել, որ հանրությունն է հանրային սեփականություն հանդիսացող տարածքի և մեր սահմանադրական իրավունքների տերը:
