Երեկ Ֆրանսիայի Սահմանադրական խորհրդի կայացրած որոշման առիթով, համաձայն որի չեղյալ հայտարարվեց Հայոց ցեղասպանության հերքումը քրեականացնող օրինագիծը, «Առաջին լրատվական»-ը ԱԺ ՀՀԿ խմբակցության պատգամավոր Արտակ Զաքարյանին հարցրեց, թե ժամանակը չի՞ արդյոք այս նուրբ, զգացմունքային հարցի վերաբերյալ դադարենք մեկ` դրական քայլը որպես մեր երկրի հաղթանակ համարել, և հիասթափվել, երբ պետությունները առաջնորդվում են սառը հաշվարկով:
Արտակ Զաքարյանը նշեց. «Անկախ նրանից, թե գործընթացը քաղաքական է, թե քաղաքական չէ` արդարության համար պայքարում իհարկե հիասթափություններով չի կարելի ապրել, և մենք հասկանում ենք, որ պայքարում ենք մի խնդրի համար, որը ունի նաև հակառակ մտածող բավական մեծ հատված, այսինքն` կան նաև մարդիկ, ովքեր պայքարում են նաև այդ խնդրի դեմ: Հաշվի առնելով թուրքական լոբբին, տարբեր քաղաքական խնդիրները, հաշվի առնելով, որ խնդիրը նաև Ֆրանսիայի ներքաղաքական բազմաթիվ այլ գործընթացների հետ ուղիղ կամ անուղղակի խաչվում է, այս բոլոր գործընթացները հաշվի առնելով, պետք է շատ սառը նայել և հաղթանակներին, և ժամանակավոր նոր ստեղծված իրողություններին, որոնք այդքան էլ ցանկալի չեն»:
ԱԺ ՀՀԿ-ական պատգամավորը հավելեց նաև. «Ես ավելի շատ այս խնդիրը կապում եմ Ֆրանսիայի ներքին խնդիրների հետ և նաև այն հանգամանքի հետ, որ դա ամբողջությամբ Հայոց ցեղասպանությանը չի առնչվում, այդ թվում՝ նաև հրեաների ցեղասպանության, մյուս ցեղասպանությունների հետ կապված խնդիր է: Սա իրոք քաղաքական հարց է, չնայած իր մեջ պարունակում է շատ խորը քաղաքական, պատմական արդարության հիմքեր, և ընդհանրապես ժողովրդավարության իրավունքի տեսակետից մեծ բազա ունի, բայց իհարկե առաջին հերթին քաղաքական խնդիր է, և քաղաքական պայքարի արդյունքում կարող են լինել տարբեր մոտեցումներ, այդ թվում՝ նաև Ֆրանսիայի Սահմանադրական խորհրդի կայացրած որոշումը: Ուստի այս հարթության վրա որևէ հիասթափություն պետք չի, առավել ևս պետք չի հետ կանգնել այն մտքից, որ այս ճանապարհը, որը անցավ Ֆրանսիան, հայ համայնքը և ամբողջ հայկական սփյուռքը, ապարդյուն էր: Ավելին՝ սա նշանակում է, որ մեր պայքարը ավելի ամուր, էլ ավելի համախմբված պետք է լինի: Իսկ մենք պայքարում ենք ընդամենը մի բանի համար. աշխարհում համընդհանուր ճշմարտության` ցեղասպանությունների դեմ քաղաքակիրթ մարդկության վերաբերմունքի համար, իսկ այդ վերաբերմունքը Ֆրանսիան արտահայտել է երկու պալատներում, դա բավական քաղաքական էներգիա է, որպեսզի նախագահ Սարկոզիի գլխավորությամբ, նրա նախաձեռնությամբ նաև հաջորդ նախաձեռնությունը, որը նույն նպատակն է ունենալու, հաջողությամբ պսակվի: Ինչ վերաբերում է հայկական լոբբիին, նա միշտ նպաստել է և նպաստելու է որպեսզի Հայ դատը որպես այդպիսին իրագործվի»:
